Երեկ երեկոյան «Ոչ թալանին» նախաձեռնող խումբը հայտարարեց, որ իրենք պայքարը տեղափոխում են «Ազատության» հրապարակ եւ բողոքի ակցիայի մասնակիցներին հորդորեց ազատել Բաղրամյան պողոտան:
Ժողովրդի մի մասը հետեւեց նախաձեռնության առաջարկին, իսկ մյուս հատվածը մնաց տեղում ու արդեն երկրորդ օրն է՝ իր պայքարն է առաջ տանում: Այդ ժամանակ բեմի դեր կատարող աղբամանների վրա բարձրացավ երիտասարդների մեկ այլ խումբ ու ստանձնեց Բաղրամյան պողոտայում շարունակվող պայքարը համակարգողի դերակատարությունը:
Արդեն երկրորդ օրն է՝ լրագրողները անարդյունք ցանկանում են պարզել, թե ովքե՞ր են այդ երիտասարդները, ի՞նչ նոր նախաձեռնող խումբ է եւ ի՞նչ պատասխանատվություն են վերցրել իրենց ուսերին: Զրուցել ենք նրանցից շատերի հետ ու ստացել միեւնույն պատասխանը՝ Հայաստանի Հանրապետության հասարակ քաղաքացիներ: «Իրականում նոր նախաձեռնություն չկա: Այստեղ մնացել է ժողովուրդը: Այստեղ չկան լիդերներ: Ժողովրդի հոծ բազմություն է, որը պայքարում է առանց լիդերների: Ուղղակի կան փոխվող մարդիկ, որոնք կարգուկանոն են հաստատում, որպեսզի իրար մեջ, ոստիկանության հետ ընդհարումներ չլինեն», – ասում են նրանք:
Aravot. am-ի հարցին, թե մինչեւ երեկ երեկո եթե զարգացումներն անցանկալի հունով ընթանային, պատասխանատվությունը կրելու էր «Ոչ թալանին» նախաձեռնղ խումբը, իսկ հիմա ո՞վ է ստանձնում խաղաղ պայքարը մինչեւ վերջ տանելու առաքելությունը, երիտասարդները պաատասխանեցին. «Ոչ ոքի վրա պատասխանատվություն չկա, որովհետեւ այստեղ բոլորը հավասար են: Այստեղ չկան լիդերներ, առաջնորդներ, կազմակերպիչներ: Կա ժողովուրդ, կան մարդիկ, որոնք իրենց պահանջն են արտահայտում առանց այն մարդկանց, որոնք երեկ այստեղից գնացին: Վախենալո՞վ, թե՞ նախագահի որոշումն իրենց բավարարեց… դա արդեն իրենք գիտեն: Այս 7-8 հազարը, որ հիմա այստեղ են եւ նրանք, ովքեր օնլայն են հետեւում, իրենց չի բավարարում», – պատասխանեցին երիտասարդները:
Կարդացեք նաև
Աշոտ ՀԱԿՈԲՅԱՆ
