Ուկրաինացի լրագրող Անդերս Ռոջերսը Հայաստանին ուղղված նամակում փորձել է Երեւանում էլեկտրաէներգիայի սակագնի բարձրացման եւ Ուկրաինայի Մայդանի միջեւ զուգահեռներ անցկացնել: Նա նշել է, որ ի սկզբանե դեմ է եղել եւ Երեւանի ցույցերին, եւ Ուկրաինայի Մայդանին, ինչի պատճառով ստիպված է եղել հեռանալ Ուկրաինայից: Այս մասին հաղորդել է «EurAsia Daily»-ն:
Լրագրողի ներկայացրած 5 կետերից առաջինում նշված է, որ փետրվարին ԱՄՆ պետքարտուղարի օգնական Վիկտորիա Նուլանդը այցելել է Հայաստան: Այցի առթիվ ամերիկացի տնտեսագետ եւ քաղաքագետ Փոլ Քրեյգ Ռոբերթսը ասել է, որ Նուլանդի այցի նպատակն էր Հայաստանում հեղափոխություն սկսել:
Երկրորդ կետում նշված է, որ Հայաստանում աշխատում են Ամերիկայի հիմնադրամների կողմից մի քանի տասնյակ ՀԿ-ներ: Եվ նրանց մեծամասնության ներկայացուցիչները ակտիվորեն մասնակցում են ցույցերին, փորձում են դրանք ղեկավարել ու տնտեսականից դարձնել քաղաքական: «Ռուսներն են մեղավոր». դա կոչերից մեկն է: Ուկրաինայում էլ էր այդպես:
Եվ Ուկրաինայում եւ Մոսկվայում, ըստ լրագրողի, գործում էին կարմիր բաճկոններով համակարգողների խմբեր, իսկ Հայաստանում նրանք կապույտ վերնաշապիկով են (քանի որ նրանք բացահայտվել են, վաղը կարող են փոխել այդ բացահայտ նշանը):
Կարդացեք նաև
Անդերս Ռոջերսի փոխանցմամբ՝ Ուկրաինայի պատգամավոր Արիեւը կոչ էր արել Հայաստանի եւ Ադրբեջանի ժողովուրդներին հեռացնել ավտորիտար իշխանություններին: Սակայն այդ մարդը կասկածելի բարոյական որակներ ուներ: «Կարող եք փնտրել սոցիալական ցանցերում, թե ինչքան «մայդանավորներ» են ուզում, որպեսզի հայերը հեռացնեն իշխանությանը»,- գրում է լրագրողը:
Լրագրողը 5-րդ կետում նշել է, որ ԱՄՆ դեսպանատունը սովորաբար նմանատիպ իրավիճակներում անհանգստություն է հայտնում: «Երբ ԱՄՆ-ում 5 ամսվա ընթացքում ոստիկանները 400 հոգու գնդակահարեցին, դա նրանց չի անհանգստացնում: Իսկ երբ Կիեւում վերջին մեկ ամսվա ընթացքում մի քանի բողոքի ցույցեր են ուժով ցրել, դա նրանց անհանգստացնում: Նրանց ինչ-որ բան «անհանգստացնում է», երբ նրանք շահ են ունենում»,- կարծում է նա:
Պատրաստեց Աշոտ ԻՍՐԱԵԼՅԱՆԸ
