Էլեկտրաէներգիայի սակագնի բարձրացման դեմ վերջին օրերին Հայաստանում անցկացվող բողոքի ակցիաները կարող են ստիպել ռուսական «Ինտեր ՌԱՈ» ընկերությանը վաճառել իր 100% դուստր ընկերությունը՝ «Հայաստանի էլեկտրական ցանցերը» (ՀԷՑ):
«Коммерсант»-ի տեղեկություններով՝ «Ինտեր ՌԱՈ»- արդեն բանակցություններ է վարել հայկական ծագումով ռուս բիզնեսմենների հետ, այդ թվում՝ «Տաշիր» խմբի սեփականատեր Սամվել Կարապետյանի հետ:
Սակայն նոր սեփականատեր գտնելը հեշտ չէ, քանի որ ՀԷՑ-ը զգալի պարտքեր է կուտակել, իսկ ցուցարարները պահանջում են, որպեսզի իշխանությունները դրանք չփոխհատուցեն բյուջեից:
Պարբերականի հետ զրույցում «Տաշիր» խմբի ներկայացուցիչները հերքել են այս տեղեկատվությունը: «Եթե վաճառքի մասին հայտարարություն լինի, ապա ցանկացած կազմակերպություն, ուսումնասիրելով պայմանները, կարող է հասկանալ, թե որքանով է տնտեսապես շահավետ ձեռք բերել մի ընկերություն, որն ունի հսկայական պարտքեր»,- ասել են «Տաշիր»-ի ներկայացուցիչները:
Կարդացեք նաև
Իսկ «Коммерсант»-ի Երեւանում գտնվող աղբյուրը հաստատել է ինչպես «Տաշիր»-ի, այնպես էլ՝ «հայազգի այլ ռուս գործարարի» հետ բանակցությունների մասին տեղեկատվությունը:
Պատրաստեց Աշոտ ԻՍՐԱԵԼՅԱՆԸ
