Ժիրայր Սեֆիլյանը անհեթեթություն որակեց Սերժ Սարգսյանի առաջարկը ակտիվիստներին:
«Անհեթեթ է, դա ցույց է տալիս, թե նա ինչքան կտրվել է իրականությունից»,- Aravot.am-ի հետ զրույցում Սերժ Սարգսյանի առաջարկի մասին այսպիսի կարծիք հայտնեց Բաղրամյան պողոտա եկած Հիմնադիր խորհրդարանի առաջնորդ Ժիրայր Սեֆիլյանը:
Ըստ Սեֆիլյանի, «Բաղրամյան 26-ում արդեն այն կարծիքին են, որ կառավարությունը կարծես կապ չունի ժողովրդի հետ: Ժողովրդին ասում են՝ ժողովուրդ ջան, դուք չեք վճարելու, կառավարությունն է վճարելու: Երբ որ այս մակարդակին են հասել, ի՞նչ խոսենք իրենց մասին: Դա արդեն ամեն ինչ ասում է»:
Կարդացեք նաև
Մեր դիտարկմանը՝ այսինքն, ուրիշ հարց կլիներ, եթե ասեին, որ մեր գրպանից ենք փոխհատուցում, ոչ թե բյուջեից, նա պատասխանեց. «Շատ լավ կլիներ այդպես լիներ, բայց դա կլինի միայն, երբ ժողովուրդը պարտադրի իր կամքը, եւ մենք այդ ուղղությամբ գնում ենք: Վստահ եմ, որ ապագայում մեր ժողովուրդը տեսնելու է եւ ռազմավարական օբյեկտների ազգայնացումը, եւ ժողովրդից թալանածի հետ վերադարձումը»:
Ժիրայր Սեֆիլյանն ասաց, որ իշխանությունների վիճակը նախանձելի չէ. «Մի քիչ էլ շարունակվի այս համառությունը եւ նահանջելու են, չկասկածեք»:
Հռիփսիմե ՋԵԲԵՋՅԱՆ
