«Շարժումն ի սկզբանե եղել է քաղաքական, ուրիշ բան, թե մարդիկ ինչ են հասկանում այդ բառի տակ»,- Բաղրամյան պողոտայում Aravot.am-ի հետ զրույցում ասաց Գյումրու Ասպարեզ լրագրողների ակումբի նախագահ Լեւոն Բարսեղյանը:
Նա հայտարարեց, որ շարժումը, երբեք պայքար չի եղել իշխանության համար. «Հանրային քաղաքականության տեսանկյունից սա սոցիալական քաղաքականությանը վերաբերվող հարց է, ինչպես նաեւ կրթությունը քաղաքականությանը վերաբերվում է՝ լինի ասենք՝ 12-ամյա՞, թե 10-ամյա, Բոլոնյան լինի՞, թե՞ ասենք՝ Մոսկովյան: Այս իմաստով՝ մարդիկ կան, որ սարսափում են այդ բառից՝ քաղաքական, մարդիկ կան, որոնք դիտավորյալ շահարկում են այդ բառը, մանիպուլյացիաների են ենթարկում: Ցուցարարներից մի քանիսը ելույթ են ունենում եւ շեշտում են, որ քաղաքական չէ, իր անձնական համոզմունքն է: Բայց ես համոզված եմ, որ սա սոցիալական քաղաքականություն փոխելու հարց է: Եվ եթե այնտեղ դիմադրությունը շատ երկարի, սա վերածվելու է իշխանափոխության շարժման, բազմաթիվ են կոչերը, ուշադիր նայե՛ք պաստառներին, բացականչություններին, դուք կտեսնեք, որ հանրության ճնշող մեծամասնությունը համոզված է, որ սա իշխանություն է ոչ մեզնից եւ ոչ մեզ համար, այս իշխանությունը պետք է վերացվի»:
Լեւոն Բարսեղյանը համոզված է, որ սա խորությամբ քաղաքական շարժում է. «Ես ի նկատի չունեմ, որ ինչ-որ մեկը սա հրահրում է դրսից, ներսից, չգիտեմ՝ այստեղ քաղաքական ուժեր կան, չկա այդպիսի բան: Մարդիկ ելել են շատ արդար սոցիալական պահանջի, այդպիսի պահանջներ բազմաթիվ են եղել, գազը հիշեք, հանքերի թալանը հիշեք, կարմիր գծերը, արագաչափերը, շատ բաները, երբ թալանվում է հանրությունը: Ո՞վ է թալանում, իշխանությունը, որը կարծես թե մեզ պետք է ծառայեր, բայց չի ծառայել: Եվ ի վերջո կարող է, երեւի պետք է վերաճի, եթե մի քիչ էլ ձգձգեն իսկապես կվերաճի կասեն՝ ախպե՛ր, գազն էլ մեռնի, ջուրն էլ, լույսն էլ, կասեն՝ արի ստեղից գնա, ա՛յ տղա: Հիմա կախված է նրանից, թե իրենց ռեակցիաները որքան արագ կաշխատեն, որքան արագ լուծում կգտնեն: Այս խնդիրը ավելի վաղ կարող էր կարգավորվել, բայց դե Մոսկվայից երեւի ասել են՝ չշարժվես, մինչեւ մի բան ասենք»:
Ամի ՉԻՉԱԿՅԱՆ
Կարդացեք նաև
