Ոստիկանապետը հետաքրքրվում է, թե ինչպես են ակտիվիստերը գիշերը լուսացրել:
Մանրամասները՝ շուտով:
Բաղրամյան պողոտայում «հարաբերական անդորր է»: Տեսադաշտում հատուկենտ ոստիկաններ են, քաղաքացիական ակտիվիստների հիմնական մասն էլ «պոստին» չէ: Ներկաներն էլ ֆուտբոլ են խաղում, երգում-պարում, մի մասն էլ տարածքի մաքրման աշխատանքներով է զբաղված: Այս ժամին պողոտայի հիմնական այցելուները տարածքում բնակվող երեխաներն են, որոնց առավոտյան զբոսանքն արդեն մի քանի օր է՝ զուգորդվում է քաղաքացիական պայքարով:
Կարդացեք նաև
«Ցուցարարները տրամադրված են մինչեւ վերջ կանգնելու ու մինչեւ հստակ որոշում չհրապարակվի այն մասին, որ էլեկտրաէներգիայի թանկացում չի լինելու, մենք Բաղրամյան պողոտան չենք ազատի»,-Aravot.am-ի հետ զրույցում ասաց քաղաքացիական ակտիվիստ Էդուարդ Մխիթարյանը`պատասխանելով հարցին, եթե երկուշաբթի օրը Հանրային ծառայությունները կարգավորող հանձնաժողովի նախագահ Ռոբերտ Նազարյանը հայտարարի, որ ՀԷՑ-երում նոր աուդիտով պայմանավորված սառեցվում է էլեկտրաէներգիայի թանկացման որոշումը, ակտիվիստները կդադարեցնե՞ն բողոքի ակցիաները:
Հիշեցնենք, երեկ երեք ժամից ավելի տեւած իշխող ՀՀԿ-ի գործադիր մարմնի նիստում այդպես էլ հստակ բան չհայտարարվեց, թե ի՞նչ է սպասվում այս հարցով առաջիկայում: ՀՀԿ մամուլի խոսնակ Էդուարդ Շարմազանովը`պատասխանելով լրագրողների հարցերին, նոր աուդիտով պայմանավորված կասեցվելո՞ւ է սակագնի թանկացման որոշումն, ասաց, որ ինքն այն պաշտոնյան չէ, որը նման հայտարարություններ պետք է անի:
«Սառեցումը ոչ մի օգուտ չի տա, մարդկանց որոշ ժամանակով հույս կտան ու ընդամենը»,- ասաց մեր զրուցակիցը` հավելելով, որ այն, որ կառավարության տարբեր ներկայացուցիչներ այժմ խոսում են երկրի էներգետիկ անվտանգության մասին` նկատելով, որ իրենց պահանջը կարող է լուրջ խնդիրներ առաջացնել, անընդունելի է, քանզի իրենց պահանջն ու ակցիաները որեւէ խոչընդոտ չեն հանդիսանում ՀԷՑ-երի աշխատանքի համար. «Ժողովուրդն առանց այդ էլ վատ վիճակում է, առանց այդ էլ արդեն թանկ է վճարում եւ պատրաստ չէ էլի ավել վճարել: Հարեւան պետություններին ավելի էժան սակագներով էներգիա են վաճառում, քան մեզ»:
Նելլի ԳՐԻԳՈՐՅԱՆ
