Գյումրիում հոսանքի թանկացման դեմ տեղի ունեցած այսօրվա բողոքի ակցիան սկսվեց քահանայի աղոթքով: Տեր Փավստոսը Գյումրու Թատերական հրապարակում նշեց, որ ժողովրդի պահանջը արդար է, եւ կոչ արեց հեռվում կանգնած ոստիկաններին չտարանջատվել ժողովրդից, քանի որ նրանք եւս ժողովրդի մասն են: Նա ոստիկաններին հասկացրեց, որ որեւէ դեպքում ձեռք չբարձրացնեն ժողովրդի վրա, քանի որ նրանց պայքարից կշահեն նաեւ իրենք:
Այնուհետ նա հրավիրեց բոլորին աղոթքի:
Կարդացեք նաև
Աղոթքից հետո սկսվեց երթը քաղաքի փողոցներով: Եվ մինչ բողոքավորները շարք կկազմեին երթը սկսելու, Գյումրու Թատերական հրապարակում հավաքված ոստիկանները ընթերցում էին նրանց ցուցապաստառները:
Գյումրեցիներն այսօր հայհոյանքներն ու որոշ վիրավորական բառեր գրել էին անգլերեն լեզվով: Ոստիկանները շատ չարչարվեցին, սակայն այդպես էլ չհասկացան, թե ինչ էր գրված ցուցապաստառներից մեկում Բիբինի հասցեին: Խոսքը «Rape Bibin, նեղանալ չկա» ցուցապաստառի մասին է, որը հայերեն թարգմանած նշանակում է՝ «Բռնաբարել Բիբինին, նեղվել չկա»: «Տեսնես ինչի՞ են գրել ռեփ, ռեփն ինչ կապ ունի Բիբինի հետ», -հարցնում էր ոստիկաններից մեկը:
Ինչեւէ, երթի մասնակիցները մտան Գյումրու հին թաղամասերից մեկը՝ երկաթգծի կայարան, սա եւս Գյումրու մարդաշատ թաղամասերից մեկն է , այստեղ կան բազմաթիվ բնակելի շենքեր ու սպասարկման օբյեկտներ:
Սակայն թաղամաս հասան բավական մեծ դժվարությամբ, այսօր Գյումրիում տեղացած հորդառատ անձրեւից հետո այնպիսի ցեխ էր քաղաքում, որ ոստիկանները ցուցարարներին խնդրում էին ոչ թե մայթով գնալ, այլ փողոցով: Ի սկզբանե որոշել էին, որ այսօր չեն քայլելու փողոցներով: Ցատկելով ցեխերի ու ջրերի միջով՝ երթի մասնակիցները պատուհաններից ու սպասարկման օբյեկտներից դուրս էին հրավիրում մարդկանց, գյումրեցի վարորդները գալիս ու ազդանշաններ տալով միանում էին բողոքավորներին:
Գյումրեցիները հայրենասիրական երգեր էին կատարում՝ երբեմն ստեղծագործելով ու փոխելով երգի բառերը: Օրինակ՝ երգում էին՝ «Սուլթան կուզի ջնջել մեզի, զարթնիր Գյումրի, մեռնիմ քեզի»: Իսկ ցուցապաստառներից մեկի վրա գրված էր. «Սերժիկ կուզե ջնջե մեզի, զարթնե՛ք հայեր, մեռնիմ Ձեզի»:
Երկաթգծի կայարանից գյումրեցի ցուցարարները շարժվեցին դեպի քաղաքի կենտրոն՝ դատախազության շենքով Գյումրու կենտրոնական հրապարակ, որտեղ գտնվում է քաղաքապետարանի շենքը, այնտեղից էլ ուղեւորվեցին դեպի Թատերական հրապարակ: Այստեղ սկսվեց շուրջպար, հաղթական տրամադրություն:
Ելույթ ունեցողներից մեկը նշեց, որ այս հրապարակում ծածանվել են բոլոր կուսակցությունների դրոշները, սակայն այժմ ծածանվում է միայն եռագույնը, ուրեմն հաղթանակը մոտենում է: Թատերական հրապարակում, երբ արդեն մութ էր ու լույսերը չէին վառվում, երիտասարդներից մեկը խորհրդանշանական մոմ սարքեց կրակով ու բերեց հրապարակ: Չնայած հորդ, սառը անձրեւին ՝ նստացույցը շարունակվում է: Վաղը հրապարակ կգան քաղաքի երեւելի մտավորականները, մեր տեղեկություններով Գյումրու Թատերական հրապարակ է պատրաստվում այցելել նաեւ Շիրակի թեմի առաջնորդ Միքայել եպիսկոպոս Աջապահյանը:
Նունե ԱՐԵՎՇԱՏՅԱՆ
