Հունիսի 26-ին ՀՀ սփյուռքի նախարարությունում կայացավ նախարարին կից ատյանի հերթական նիստը:
Օրակարգում ընդգրկված էր երեք հարց: Տեղեկատվության և հեռահաղորդակցության վարչության պետ Վ. Վարդանյանը ներկայացրեց ՀՀ կառավարության 2011 թվականի մարտի 10-ի N 211-Ն որոշմամբ հաստատված «Տեղեկատվական և ուսուցողական կայքերի մշակման և սպասարկման ծառայություններ» ծրագրի կատարման ընթացքը: Խոսելով վարչության գործառույթների մասին՝ զեկուցողը նշեց. «Սփյուռքում հայոց լեզվի պահպանման և տարածման խնդիրն օրակարգային է։ Սփյուռքահայության ստվար հատվածը չի տիրապետում կամ մասնակիորեն է տիրապետում մայրենի լեզվին։ «Տեղեկատվական և ուսուցողական կայքերի մշակման և սպասարկման ծառայություններ» ծրագրի շրջանակներում մշակվել և գործարկվում են ՀՀ սփյուռքի նախարարության էլեկտրոնային գրադարանը՝ www.libmindiaspora.am, Սփյուռքի պատմության վիրտուալ թանգարանը՝ www.armdiasporamuseum.com, Արևելահայերենից՝ արևմտահայերեն և հակառակը փոխարկիչ ծրագիրը (այժմ ISMA ինտերնետային լեզվային կենտրոն) www.translator.am, և ՀՀ սփյուռքի նախարարության «Հայերն այսօր» ամենօրյա էլեկտրոնային թերթը՝ www.hayernaysor.am: Գրադարանում յուրաքանչյուր ամիս թվայնացվում և տեղադրվում է 3.000 – 3.500 էջ ծավալով նյութ: Նորություն է կայքի «Համաշխարհային գրականություն» բաժինը, որտեղ սկսել ենք տեղադրել համաշխարհային գրականության ընտրանին՝ հայերեն թարգմանությամբ։
Սփյուռքի պատմության վիրտուալ թանգարանի կայքը ստեղծվել և թողարկվել է 2012 թվականին Հայաստանի անկախության 20-ամյա հոբելյանի առիթով, նպատակ ունենալով ներկայացնելու հայ ժողովրդի պատմությունը, ներկան և ապագայի տեսլականը, աշխարհասփյուռ հայության և Հայաստանի Հանրապետության կապի խնդիրները՝ առաջնորդվելով «Հայերը մեկ ազգ են՝ անկախ բնակության վայրից», և «Բոլոր հայերի Հայրենիքը Հայաստանն է» կարգախոսներով:
Զեկուցողն անդրադարձավ նաև Հայկական սփյուռքի տարբեր հատվածներում լեզվապահպանության խնդրի լուծման առաջնային միջոց համարվող առցանց բազմալեզու բառարանների նոր ձևաչափի ստեղծմանը, որոնք մեկտեղված են www.translator.am հասցեում գործող ինտերնետային փոխարկիչ ծրագրի գործառույթներին զուգահեռ: Այսօր www.translator.am կայքի այցելությունների միջին ամսական թիվը կազմում է 25000-30000:
Կարդացեք նաև
Վ. Վարդանյանը ներկայացրեց նաև նախարարության «Հայերն այսօր» էլեկտրոնային պարբերականի իրականացրած աշխատանքները, ըստ որի՝ հրապարակվել է շուրջ 4200 լրատվական նյութ, 240 հոդված, ակնարկ, վերլուծական նյութեր, 144 հարցազրույց:
ՀՀ սփյուռքի նախարարության «Սփյուռք» ամառային դպրոց» 2015-ի նախապատրաստական աշխատանքների մասին զեկուցեց համահայկական ծրագրերի վարչության պետ Գ. Գյանջումյանը: Նա մասնավորապես նշեց. «2015 թվականը ծրագրի իրականացման 4-րդ տարին է՝ ՀՀ սփյուռքի նախարարությունը Երևանի պետական համալսարանի հետ համագործակցությամբ 2012 թվականից իրականացնում է «Սփյուռք» ամառային դպրոց» ծրագիրը: Յուրաքանչյուր տարի մեծանում է ծրագրին մասնակցել ցանկացողների թիվը, դպրոցը դառնում է Սփյուռքի կողմից, թերևս, ամենապահանջված ծրագրերից մեկը և արդեն կայացած կառույց է:
Եթե 2012 թվականին նախատեսված 70 մասնակցի փոխարեն Ամառային դպրոցն ընդունել է 131 մասնակից՝ 15 երկրից, ապա 2013 թվականին նախատեսված 100-ի դիմաց մասնակցել է 201 սփյուռքահայ՝ 20 երկրից, 2014թ. նախատեսված 100-ի դիմաց՝ 222 սփյուռքահայ, աշխարհի 22 երկրից: 2015թ. նախատեսված է 250 սփյուռքահայի մասնակցություն»:
Ամփոփելով իր խոսքը՝ Գ. Գյանջումյանը նշեց, որ ուսումնական, տեսական և գործնական պարապմունքներին զուգահեռ՝ կիրականացվի նաև միջոցառումների, թանգարաններ այցելությունների, շրջագայությունների, հանդիպումների ծրագիր: «Սփյուռք» ամառային դպրոցի բացումը կկազմակերպվի հայոց լեզվի դասընթացի հանդիսավոր մեկնարկով, իսկ փակումը՝ օգոստոսի 1-ին հավաստագրերի հանձնման արարողությամբ»:
Հայրենադարձության և հետազոտությունների վարչության 2014-2015թթ. իրականացրած աշխատանքների վերաբերյալ զեկուցեց վարչության պետ Գ. Արշակյանը:
Զեկուցողն անդրադարձավ հաշվետու ժամանակաշրջանում իրականացրած քննարկումներին, գիտաժողովներին ու համաժողովներին: 2014թ. իրականացվել է «Իսլամացած հայերի խնդիրների շուրջ» խորագրով կլոր սեղան-քննարկում, Բրյուսելի «Հայ տուն» մշակութային կենտրոնում՝ «Հայոց ցեղասպանության 100–րդ տարելիցին նվիրված միջոցառումները համակարգող Եվրոպայում գործող տարածաշրջանային հանձնախմբերի ղեկավարների և ներկայացուցիչների» հավաք-հանդիպում, Հայոց ցեղասպանության 100-րդ տարելիցին նվիրված միջոցառումները համակարգող տարածաշրջանային հանձնախմբերի ներկայացուցիչների հավաք-հանդիպում:
Գ. Արշակյանն անդրադարձավ Հայաստան-Սփյուռք հինգերորդ համաժողովին:
Ներկայացվեցին նաև 2015թ. Հայոց ցեղասպանության 100-րդ տարելիցին նվիրված միջոցառումները համակարգող պետական հանձնաժողովի 5-րդ ընդլայնված նիստի, «Ընդդեմ Ցեղասպանության հանցագործության» գլոբալ ֆորումի, «Ցեղասպանության հանցագործության կանխարգելման և պատասխանատվության միջազգային իրավական հիմնախնդիրները» միջազգային գիտաժողովի աշխատանքները:
Զեկուցողն անդրադարձավ նաև վարչության կողմից իրականացվող պարբերական հետազոտություններին:Նա նշեց, որ ամենշաբաթյա ուսումնասիրության շրջանակներում մշակվում և պարբերաբար ներկայացվում են արագ արձագանքման տեղեկանքներ հայկական և օտարերկրյա մամուլում Սփյուռքի համայնքների, հայության և համահայկական նշանակություն ունեցող հիմնախնդիրների վերաբերյալ: Պարբերական ուսումնասիրություններ և հետազոտություններ են կատարվում տարբեր երկրներում Հայոց ցեղասպանության ճանաչման և դրա շուրջ ընթացող գործընթացների վերաբերյալ:
Ամփոփելով նիստը՝ սփյուռքի նախարար Հրանուշ Հակոբյանը անդրադարձավ նախորդ մեկ ամսվա ընթացքում կատարված աշխատանքներին, ձեռքբերումներին ու բացթողումներին, և կարևորեց սերտ կապն ու համագործակցությունը Սփյուռքի բոլոր հայ համայնքների հետ, նախարարության ծրագրերին նրանց ակտիվ մասնակցության ապահովելուն ուղղված՝ վարչությունների կազմակերպված ու համակարգված աշխատանքը:
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ՍՓՅՈՒՌՔԻ ՆԱԽԱՐԱՐՈՒԹՅՈՒՆ
Ուղղակի Հրանուշները լացացրին: Գնացեք Բաղրամյան մարդկանց սատարելու այ դեմագոգներ!