Եվրոպայի խորհրդի խորհրդարանական վեհաժողովի (ԵԽԽՎ) ամառային նստաշրջանի լիագումար նիստում ԵԽԽՎ-ում հայաստանյան պատվիրակության անդամ, ՀԱԿ խմբակցության ղեկավար Լեւոն Զուրաբյանը բարձրացրեց քաղաքական բանտարկյալների հարցը:
Նա հղում կատարեց 2012-ի հոկտեմբերի 3-ին` Վեհաժողովի ընդունած Բանաձև 9000-ին, որտեղ տրվում է քաղբանտարկյալ եզրույթի սահմանումը: Ըստ այդ բանաձևի` ներկայացված են այն հինգ չափորոշիչները, որոնց առկայության դեպքում ազատազրկված անձը համարվում է քաղաքական բանտարկյալ:
Լեւոն Զուրաբյանը շեշտեց այն հանգամանքը, որ թեև բանաձևում սահմանված է քաղաքական բանտարկյալ եզրույթը, սակայն պետք է անդամ երկրները մշտապես ուշադրության կենտրոնում պահեն այս հարցը` ապահովելով մարդկանց իրավունքները:
Այս համատեքստում պրն Զուրաբյանը հպարտությամբ հայտարարեց, որ Հայաստանում հիմնադրվել է Հայաստանի Ստրասբուրգյան կոմիտեն: Այն զբաղվելու է Հայաստանում մարդու քաղաքական ու քաղաքացիական իրավունքների և ազատությունների իրացմանն ուղղված գործունեության պատճառով զանգվածաբար տեղի ունեցող հալածանքների և ազատազրկումների դեպքերով` նպատակ ունենալով ջանքերի համադրման ու միասնական դիրքորոշումներ ձևավորելու ու արտահայտելու միջոցով մեծացնելու այդպիսի հալածանքի ենթարկված անձանց իրավունքների պաշտպանության արդյունավետությունը:
Կարդացեք նաև
Լեւոն Զուրաբյանը կոչ արեց Վեհաժողովին աջակցել այս նախաձեռնությանը և հույս հայտնեց, որ մյուս անդամ երկրները ևս, հետևելով Հայաստանի օրինակին, կհիմնադրեն Ստրասբուրգյան կոմիտեներ, որոնք կզբաղվեն քաղաքական դրդապատճառներով ազատազրկվածների իրավունքների պաշտպանությամբ:
Տաթև ՀԱՐՈՒԹՅՈՒՆՅԱՆ
