Բաղրամյան պողոտայում տեղակայված «Անվտանգության կամ բուֆերային գոտում», որը «Ոչ թալանին» անունը կրող բողոքի ակցիայի մասնակիցներին բաժանում է ոստիկանների շարքերից, այսօր առավոտվանից, բացի «Սանիտեկի» աղբամաններից, նաեւ պարաններով է առանձնացված:
Քիչ առաջ ոստիկանությունը եկավ եւ պահանջեց, որպեսզի շտապօգնության մեքենայի համար պարաններն իջեցնեն, ճանապարհ բացեն, ասելով, որ ներքեւի հատվածում մարդ է վատացել: Երիտասարդները բացեցին ճանապարհը, բայց երբ մեքենան հասավ աղբամաններով պատրաստված պատնեշին, եւ այդտեղ ոստիկաններն ու բժիշկները սկսեցին խնդրել բացել ճանապարհը, երիտասարդները հրաժարվեցին՝ այլ ճանապարհ ցույց տալով շտապօգնության մեքենային եւ ոստիկանությանը: Նրանք ասում էին, որ ցուցարարներին մոտենալու համար շատ ավելի ճիշտ կլինի Օպերայի մոտից՝ ներքեւի հատվածից մոտենալ:
Մեզ հետ զրույցում ակցիայի մասնակիցները վստահություն հայտնեցին, որ դա դիտավորյալ էր կազմակերպած ոստիկանության կողմից՝ պատնեշը քանդելու համար, քանի որ ոստիկաններն էլ, բժիշկներն էլ շատ լավ գիտեին, որ ներքեւի կողմից կարող են հանգիստ մոտենալ, բայց փորձ արեցին ճեղքել պատնեշը:
Նելլի ԲԱԲԱՅԱՆ
