«Ուշադիր ենք լինում մեր կողակիցներին, պահպանում ենք մեր կողքինի հանդարտ քունը, պահպանում ենք մաքրությունը: Եկեք նստենք թաց ասֆալտին, մի քիչ հովանանք եւ չմոռանանք, որ սա նստացույց է, իսկ մենք կանգնած ենք: Հանգիստ տեղավորվեք»,- քիչ առաջ Բաղրամյան պողոտայում հավաքվածներին դիմեցին «Ոչ թալանին» նախաձեռնության անդամները:
Նախաձեռնության անդամներից մեկն էլ շարունակեց, թե «Այս պայքարը րոպե առ րոպե տանուլ են տալիս, իսկ մենք հաղթելու ենք»:
Բացի հիմնական պահանջի՝ «չեղարկել» վանկարկելուց, ցուցարարները վանկարկում էին նաեւ «Սերժիկ հեռացիր» եւ «չեբուրաշկա»:
Նախաձեռնության անդամները, սակայն սաստեցին այդ կոչերն անողներին. «էդ մի երկու հոգին որ ասում են ու տարածում, թույլ մի տվեք, դա կլինի սադրանք: Մենք գիտենք, չէ՞, ինչի՞ համար ենք հավաքված: Մենք պահանջում ենք հոսանքի թանկացումը վերացնել, թանկացնելու որոշումը չեղարկել եւ պատժել այն ոստիկաններին, որոնք քաղաքացիական հագուստով այստեղ մարդկանց ծեծում էին: Սա մեր՝ «Ոչ թալանին» նախաձեռնության համակարգող խմբի պաշտոնական դիրքորոշումն է: Իսկ հարթակից ներքեւ, եթե կլինեն կոչեր, որոնք վիրավորանք չեն պարունակում, մենք չենք կարող միջամտել, դա քաղաքացիների ազատությունն է»:
Կարդացեք նաև
«Եթե հայհոյանք չեն պարունակում ձեր կոչերը, դուք ուզում եք կոչել, ապա ազատ զգացեք ձեզ, մենք չենք ուզում խրատել, բայց չափը մի անցեք»,- եզրափակեց մեկ այլ ակտիվիստ:
Ինչ-որ մեկն էլ հարցրեց՝ «չեբուրաշկա կարո՞ղ ենք գոռալ»: Ակտիվիստները նրան կրկին սաստեցին:
Արփինե ՍԻՄՈՆՅԱՆ
