Ինչպես արդեն տեղեկացրել ենք, Եվրոպայի խորհրդի խորհրդարանական վեհաժողովը (ԵԽԽՎ) ամառային նստաշրջանի լիագումար նիստում ընդունել է «Մամուլի պատասխանատվություն և էթիկա. փոխելով լրատվական միջավայրը» բանաձևը՝ հիմնված ուկրաինացի պատվիրակ Վոլոդիմիր Արիևի զեկույցի վրա:
Բանաձևով կոչ է արվում անդամ երկրների լրատվամիջոցներին ստորագրել էթիկայի վարքականոններ, ներդնել մամուլի օմբուդսմենի ինստիտուտը և մեխանիզմներ, որոնք հնարավորություն կտան ընթերցողների դժգոհություններն ու դիտարկումները տեղ հասցնել:
Զեկույցի ներկայացումից հետո ազատ դեբատների ընթացքում ելույթ ունեցով ԵԽԽՎ-ում հայաստանյան պատվիրակության անդամ, ՀՀ ԱԺ ՀԱԿ խմբակցության ղեկավար Լևոն Զուրաբյանը: Նա մտահոգություն հայտնեց, որ hայաստանյան հեռուստաընկերությունները վերահսկվում են ու մանրամասնեց. «Ցանկացած անկախ հեռուստաընկերության բացառումը հայաստանյան իշխանությունները արհեստականորեն կրճատել են տեխնիկապես հասանելի հաճախականությունների թիվը 18-ի: Հեռարձակող լրատվամիջոցների մեծամասնությունը պատկանում է գործող նախագահի փեսային, մնացածը փոխկապակցված են կառավարության կամ իշխող կոալիցիայի կուսակցությունների հետ»:
Լևոն Զուրաբյանը մտահոգություն հայտնեց, թե երկրի նախագահական ապարատը լրատվադաշտը պահում է խիստ վերահսկողության ներքո:
Կարդացեք նաև
Լևոն Զուրաբյանը ԵԽԽՎ ամբիոնից հայտարարեց, թե գրաքննության երևույթը հայաստանյան լրատվադաշտում համատարած բնույթ է կրում, ուստի Վեհաժողովը քայլեր պետք է ձեռնարկի բազմակարծության և լրատվամիջոցների բազմազանության ապահովման համար՝ համաձայն բանաձև 1837-ի:
Այս մասին խոսելով՝ Լևոն Զուրաբյանը վեհաժողովին տեղեկացրեց մեկ օր առաջ Բաղրամյան պողոտայում տեղի ունեցածը, երբ ոստիկանությունը ուժ է կիրառել լրատվամիջոցների ներկայացուցիչների և խաղաղ ցուցարարների նկատմամբ, որոնք պայքարում էին էլեկտրաէներգիայի սակագնի թանկացման դեմ. «Կոտրել են լրագրողներ տեսախցիկները, 237 մարդ բերման է ենթարկվել: Միայն միջազգային կազմակերպությունների խիստ հայտարարություններից հետո հայաստանյան իշխանությունները նրանց բաց թողեցին: Չնայած բռնություններին ու ուժի գործադրմանը՝ ցույցերը դեռ շարունակվում են»:
Լևոն Զուրաբյանը կոչ արեց վեհաժողովին ինչպես որ հարկն է քննության առնել այս իրավիճակը և ժողովրդավարությանը, մարդու իրավունքների պաշտպանությանը համահունչ քայլեր ձեռնարկել:
Տաթև ՀԱՐՈՒԹՅՈՒՆՅԱՆ
