Քիչ առաջ Բաղրամյան պողոտայում մի սփյուռքահայ ակտիվիստներին էր ուղարկել պիցցա եւ ֆրեշ հյութեր:
«Ոչ թալանին» շարժման անդամները որոշեցին մի քանի տուփ պիցցա էլ ոստիկաններին տանել, սակայն տարաձայնություն առաջացավ ակցիայի մասնակիցների միջեւ: Մի կին կտրականապես դեմ էր, որ ոստիկաններին պիցցա տան՝ «Գրողը ուտեն, ուտեն ուժեղանան, որ մեզ ծեծե՞ն»:
Շարժման անդամներից մեկը բացատրեց. «Ոչինչ, թող խփեն, մենք իրենց նման չենք»:
Պիցցան երբ հյուրասիրեցին ոստիկաններից մեկին, նա հրաժարվեց: «Սոված չե՞ք»,- հարցրեց ակտիվիստը, ոստիկանը վստահեցրեց, որ՝ ոչ: Նա հրաժարվեց նաեւ ակտիվիստների հյուրասիրած սառը սուրճից:
Կարդացեք նաև
Մյուս ոստիկանները նույնպես հրաժարվեցին: Նրանցից մեկի խոսքերով՝ «Մերսի, լավ կերած էլ ենք, խմած էլ ենք, կուշտ ենք»: Միայն մի կին ոստիկան խոստացավ համտեսել պիցցաներից, բայց՝ ծառայությունից հետո. «Իմ փայը պահեք»:
Ոստիկանները բարի ախորժակ ասացին ակտիվիստներին: Վերջիններս, այնուամենայնիվ, մի քանի տուփ պիցցա եւ սուրճ թողեցին ոստիկանների մոտ:
Հռիփսիմե ՋԵԲԵՋՅԱՆ
