Human Rights Watch իրավապաշտպան կազմակերպությունն անդրադարձել է 2 օր առաջ Հայաստանում ոստիկանների կողմից «Ոչ թալանին» քաղաքացիական նախաձեռնության կազմակերպած բողոքի ցույցի մասնակիցների նկատմամբ գործադրված բռնություններին: Այս առնչությամբ իրավապաշտպան կազմակերպությունը մտահոգություն է հայտնել:
Երեկ տարածված մամուլի հաղորդագրությամբ՝ կազմակերպությունը Հայաստանի իշխանություններին կոչ է արել անհապաղ մանրակրկիտ եւ անաչառ հետաքննություն անցկացնել ու պարզել, թե արդյո՞ք ոստիկանների գործողությունները համաչափ էին եւ պատասխանատվության ենթարկեն այն պաշտոնյաներին, որոնք պատասխանատու են ուժի գործադրման համար:
Human Rights Watch-ի ներկայացուցիչ Գիորգի Գոգիան հայտարարել է, որ եթե անգամ Երեւանում անցկացված ցույցն արտոնված չէր, դա չի արդարացնում հիմնականում խաղաղ ցուցարարների եւ ցույցը լուսաբանող լրագրողների դեմ իրականացված ֆիզիկական բռնությունները: «Ցուցարարներին ծեծի ենթարկած եւ լրագրողների աշխատանքը խոչընդոտած ոստիկանները պետք է պատասխանատվության ենթարկվեն»:
Դեպքերին անդրադարձել է նաեւ Freedom House միջազգային իրավապաշտպան կազմակերպությունը: Freedom House-ի Եվրասիա ծրագրի ղեկավար Սյուզան Քորքը դատապարտել է 237 խաղաղ ցուցարարների ձերբակալությունը:
Կարդացեք նաև
«Հազարավոր հայերը, որոնք Երեւանում ցույց էին դուրս եկել համատարած կոռուպցիայի դեմ, իրականացնում էին հավաքների ազատության եւ արտահայտվելու իրենց սահմանադրական իրավունքները: Հոսպիտալացված բնակիչների, ծեծված լրագրողների եւ կոտրված նկարահանող սարքերի նկարները ցույց են տալիս, որ նրանց իրավունքները ոտնահարվել են: Մենք կոչ ենք անում անցկացնել ոստիկանության բռնությունների եւ ցուցարարների դեմ ուժի կիրառման դեպքերի լիարժեք եւ թափանցիկ հետաքննություն»,- մասնավորապես ասել է Սյուզան Քորքը:
Պատրաստեց Աշոտ ԻՍՐԱԵԼՅԱՆԸ
