Բաղրամյան պողոտայի սկզբում «Ոչ թալանին» նախաձեռնության անդամները քիչ առաջ քոչարի էին պարում: Այս պահին այստեղ խաղաղ մթնոլորտ է, այստեղ են պատգամավորներ, մտավորականներ:
Aravot.am-ը զրուցեց Հիմնադիր խորհրդարանի անդամ Վարդան Հակոբյանի հետ՝ հետաքրքրվելով՝ ճի՞շտ է համարում ակտիվիստների մարտավարությունը ՀՀ նախագահի հետ հանդիպումը մերժելու առումով:
Հիշեցնենք, որ արդեն երկու օր է ՀՀ նախագահը պատրաստակամություն է հայտնում մի խումբ ակտիվիստների հետ հանդիպելու ու նրանց պահանջները լսելու:
Կարդացեք նաև
«Ինչ բանակցության մասին կարող է խոսք լինել, շատ հստակ ձեւակերպված պահանջ է: Այստեղ բանակցելու եզրեր չկան, եթե բանակցելու ցանկություն կար, այս երիտասարդները երեք օր ու գիշեր նստացույց էին անում օպերայի հրապարակում, այն ժամանակ կար հնարավորություն բանակցելու, այժմ՝ ոչ»,- ասաց Վարդան Հակոբյանը:
Մեր հարցին՝ ՀՀ նախագահին մինչեւ կեսօր ակտիվիստների տված վերջնաժամկետից հետո ո՞րն է լինելու համարժեք քայլը, պարոն Հակոբյանն ասաց. «Չեմ պատկերացնում՝ ինչ կլինի համարժեք քայլը, բայց սա արդեն համարժեք քայլ է (ցույց է տալիս հավաքված երիտասարդներին) այստեղից ոչ ոք չի հեռանալու:
Ինչ վերաբերում է իշխանության ներկայացուցիչների հայտարարություններին, թե էլեկտրաէներգիայի սակագնի բարձրացումն անխուսափելի է, ասաց եթե նրանց համար անխուսափելի է, թող հիմա մտածեն՝ ինչպես են խուսափելու:
Մեր դիտարկմանը, թե միջազգային լրատվամիջոցները էլեկտրաէներգիայի պայքարը անվանում էին էլեկտրոմայդան, տեղի՞ն էր համեմատությունը մայդանի հետ, ասաց. «Մերը Ազատության հրապարակն է, մերը մայդան չի կարող լինել, մենք մեր իրավունքների համար ենք պայքարում: Երբ Ազատության հրապարակը կար, ազատության շարժումը կար, մայդանը դեռ գոյություն չուներ… այս պայքարի ավարտը կասեցումն , մի պահանջ կա կասեցում»:
Մանրամասներն ավելի ուշ՝ տեսանյութում
Արփինե ՍԻՄՈՆՅԱՆ
