Երթով դեպի Բաղրամյան 26 գնացող բողոքի ակցիայի մասնակիցները Մաշտոցի պողոտայի եւ Բաղրամյան փողոցի խաչմերուկից որոշեցին հետ դառնալ Ազատության հրապարակ: Մինչ երթը շարժվում էր դեպի ՀՀ նախագահի նստավայր ոստիկանության զորքերը վազքով եւ ոստիկանական մեքենաներով շարժվեցին ուղիղ նախագահական: Ճանապարհի եզրով կանգնած ոստիկանները հսկում էին, որ ակցիայի մասնակիցները դուրս չգան փողոց:
Կարդացեք նաև
Aravot.am-ն ականատես եղավ, թե ինչպես ոստիկաններից մեկը ռադիոկապով հրահանգ ստացավ ցրել ակցիան եւ չթողնել մոտենալ նախագահականին մինչեւ որ ոստիկանական զորքերը կհասնեն նախագահի նստավայր: Չի բացառվում, որ այս մասին տեղեկացրին նաեւ ակցիայի կազմակերպիչներին, որոնք միանգամից փոխեցին նախագահական գնալու մտադրությունը պատճառաբանելով՝ «Իմաստը ո՞րն է, որ գնանք նախագահական, նորից ծեծ լինի, մեր նպատակը դա չէ, մենք կսպասենք մինչեւ մեր ընկերներին էլ կազատեն եւ հետագա քայլերի ծրագիր կմշակենք»:
Վերադառնալով Ազատության հրապարակ՝ ակցիայի մասնակիցներին կազմակերպիչները կոչ արեցին լսել միայն կազմակերպիչների հրահանգները, անկախ նրանից հայտնի մարդ ինչ-որ ցուցումներ կտա՝ չենթարկվեն: Ըստ նրանց կես ժամից իրենց կմիանան «Ոչ թալանին» նախաձեռնության մնացած անդամները, որոնք այս պահին դեռ ոստիկանությունում են եւ միասին կքննարկեն հետագա անելիքները:
Ակցիայի մասնակիցներին միացավ նախաձեռնության ակտիվ անդամ Մաքսիմ Սարգսյանը, որը ժամեր շարունակ ոստիկանությունում էր գտնվում եւ վատառողջ էր: Նրան դիմավորեցին ծափահարություններով, «մեր տղան է գալիս», «մեռնեմ ջանին», «քեզ հետ ենք, քեզ մենակ չենք թողնի» վանկարկումներով: Նա բարձրացավ հարթակ, սակայն վատառողջ լինելու պատճառով չկարողացավ երկար խոսել:
Ի դեպ, Ազատության հրապարակի երթին մասնակցելու էին եկել նաեւ սփյուռքահայեր, այստեղ ապրող սիրիահայեր:
Այս պահին Ազատության հրապարակում են նաեւ Արամ Զավենի Սարգսյանը, Դավիթ Շահնազարյանը, Խաչատուր Քոքոբելյանը, Արմեն Մարտիրոսյանը, Անուշ Սեդրակյանը եւ այլ քաղաքական եւ հասարակական գործիչներ:
Լուսինե ԲՈՒԴԱՂՅԱՆ
Անուշ ՄԱԹԵՎՈՍՅԱՆ
