Եվրոպայի խորհրդի խորհրդարանական վեհաժողովի (ԵԽԽՎ) լիագումար նիստում Եվրոպայի խորհրդի գլխավոր քարտուղար Թորբյորն Յագլանդի ելույթից հետո ԵԽԽՎ Ադրբեջանի պատվիրակության անդամ Ռաֆայել Հուսեյնովը բարձրացրեց ադրբեջանցի փախստականների հարցը՝ նշելով, թե ոչ մի դրական արդյունք չեն նկատում:
Թորբյորն Յագլանդը նշեց. «Դուք ինձնից լավ գիտեք, որ այդ հարցերը խճճված են: Բայց մենք չենք կարող խառնվել բանակցությունների գործընթացին, դրանով զբաղվում է Մինսկի խումբը: Այո, ես էլ եմ կարծում, որ այս հարցի կարգավորման դեպքում արդյունքի չենք հասել, բայց ես, եթե հայտարարեմ, թե մենք ինչ կոնկրետ քայլեր ենք ձեռնարկում, գուցե իրավիճակին խանգարե՞նք»:
Այնուհետև ԵԽԽՎ հայաստանյան պատվիրակության անդամ Վահան Բաբայանը վեհաժողովին տեղեկացրեց, որ Ադրբեջանի պաշտպանության նախարար Զաքիր Հասանովը հայտարարել է, թե ադրբեջանական զինված ուժերը միշտ պատրաստ են ոչնչացնել հայերին, իրենց բանակի զինանոցում կան տեղական եւ արտասահմանյան արտադրության նոր, որակյալ, ճշգրիտ եւ մեծ կործանարար ուժ ունեցող զենքեր ու հարցրեց՝ ո՞րն է ԵԽ գլխավոր քարտուղարի գնահատականը այս հայտարարությանը: Նա հայտարարեց. «Ես այդ հայտարարությունը չեմ տեսել, բայց, ընդհանուր առմամբ ինչ վերաբերում է այս հակամարտությանը, որը երբեմն շատ վտանգավոր է դառնում, ԵԽԽՎ-ն չունի որևէ մանդատ հակամարտության կարգավորման համար: Կարգավորման ձևաչափը Մինսկի խմբի ձևաչափն է, մենք չունենք դերակատարություն այդ հարցում»:
Տաթև ՀԱՐՈՒԹՅՈՒՆՅԱՆ
