ԱԺ-ում քննարկվեց «Գիտական եւ գիտատեխնիկական գործունեության մասին» ՀՀ օրենքում փոփոխություններ կատարելու մասին հարցը: Ինչպես տեղեկացրել ենք, նախագծով կառավարությունն առաջարկում է սահմանել, որ բարձրաստիճան պաշտոնական անձինք գիտական աստիճանի չեն կարող հավակնել: Երկրի շուրջ 500 պաշտոնյաները իրավունք չեն ունենա իրենց պաշտոնավարման ընթացքում գիտական աստիճաններ ստանալ, բայց կարող են շարունակել զբաղվել գիտական աշխատանքով:
ԿԳ նախարար Արմեն Աշոտյանը բացատրեց, որ պաշտոնատար անձինք, օրինակ, էթիկայի հանձնաժողովին ներկայացնում են եկամուտների հայտարարագիր: Արծվիկ Մինասյանին այս բացատրությունը տարօրինակ թվաց. «Հայտարարագիր ներկայացնում են նաեւ նրանց հետ փոխկապակցված անձինք, բերեք նրանց էլ արգելեք գիտական աստիճան ստանալ, իրավունք չունեն պաշտպանելու: Այս ձեւակերպումն ո՞ւր է տանում»:
Ըստ Արծվիկ Մինասյանի, գիտնականը ազատ միտք ունեցողն է, նա չպետք է անընդհատ խոնարհվի վարչական ապարատի առաջ. «Գիտնականին դրել ենք հարվածների տակ, որը պետք է բոլորի հետ լեզու գտնի»:
Նա ասաց, որ Աշոտյանը առաջադեմ հայացքներ ունի, բայց չի հասկանում, թե որտեղից է այս նախագիծն ի հայտ եկել: Արծվիկ Մինասյանը հորդորեց դեմ քվեարկել նախագծին:
Կարդացեք նաև
Ըստ «Ժառանգություն» խմբակցության ղեկավար Ռուբեն Հակոբյանի, գիտնական լինելը եւ կոչում ստանալը քաղաքական օժիտ չի, որ պաշտոնյան դնի դարակում ու ասի՝ գիտեք, ես մարզպետ եմ, պաշտոնյա եմ եւ գիտնական եմ: Նա ասաց, որ այնուամենայնիվ, սա մեր իրավիճակից բխող նախագիծ է: Մարդու իրավունքների խախտում է, բայց կան մարզպետներ, պաշտոնյաներ, որոնք հենց որպես օժիտի էլ վերաբերվում են գիտական աստիճանին, ուստի ինքը կողմ է օրենքի ընդունմանը:
ԿԳ նախարար Արմեն Աշոտյանն ասաց, որ մեր երկրի 500 բարձրաստիճան պաշտոնյաների մեջ կարող է լինել առավելագույնը 70 ընդդիմություն, 430-ը՝ իշխանություն. «Հետաքրքիր նախադեպ է ԱԺ-ում, երբ ընդդիմությունը խորհրդարանում պայքարում է իշխանավորների իրավունքների համար: Սա ուզում եմ արձանագրել՝ որպես լավ քաղաքական մշակույթ: Բայց տեղին չէ: Հասկանում եմ, որ սահմանափակում ենք ներմուծում: Եթե կարծում եք, որ պետական կառավարման մարմին պետք չէ, եկեք մենք մեր բակերում հավաքվենք ու իրար կոչում շնորհենք: Վերեւի հարեւանը թող լինի ակադեմիկոս, ներքեւինը՝ դոցենտ: Իհարկե, պետք է պետական վերահսկողություն: 2-3 տարի աշխատում ենք այս նախաձեռնության վրա, խնդրեմ աշխատենք միասին, կանոնակարգենք ոլորտը գիտական աստիճանաշնորհման»:
Տեսնելով, որ ԿԳ նախարարը մանրակրկիտ բացատրություններ է տալիս՝ ինչ-որ տեղ շտապող գեներալ Սեյրան Սարոյանը ընդհատեց. «Լավ, համոզեցիք, էլ ի՞նչ»:
Արմեն Աշոտյանն էլ հավաքեց իր թղթերը եւ հեռացավ՝ ասելով. «Լավ, որ գեներալն ասում է համոզեցի, ես կսահմանափակեմ իմ խոսքը եւ կխնդրեմ պատեհ պահին դնել քվեարկության»:
Մինչ քվեարկությունը ՀՅԴ պատգամավոր Աղվան Վարդանյանը զգուշացրեց. «Ակնհայտորեն, այս օրենքը դեմ է առողջ տրամաբանությանը: Մենք ուղղակի ընդունում ենք, որ ի վիճակի չենք տարբերել իրական գիտական աշխատանքը եւ վախենում ենք, որ պետական պաշտոնյաներն իրենց լծակները օգտագործելով՝ կդառնան գիտնական: Այս օրենքը ընդունելուց հետո ես երաշխավորում եմ՝ վաղը բարձրաստիճան պաշտոնյաները եւ նրանց հետ փոխկապակցված անձինք՝ երեխաները, զոքանչները, բոլորը կդառնան թեկնածու ու դոկտոր: Կոչ եմ անում ընդդիմությանը չքվեարկել այս օրենքին, թող մեծամասնությունը միայնակ անցկացնի»:
Սամվել Ֆարմանյանն էլ կատակեց, որ բարձրագույն պետական այն պաշտոնյաները, որոնք թաքնված լոմոնոսովներ են, կարող են շարունակել իրենց գիտական ուսումնասիրությունները եւ միանգամից ընտրվել ակադեմիայի անդամներ, օրենքը սա չի արգելում:
Քվեարկության արդյունքներով՝ նախագիծը չընդունվեց, կողմ էր քվեարկել 61 պատգամավոր, դեմ 1, մյուսները չէին մասնակցել քվեարկությանը:
Հռիփսիմե ՋԵԲԵՋՅԱՆ
