«Պարո՛ն Սահակյան, ճիշտ կլիներ ոչ թե միանգամից սկսեինք քվեարկությամբ: Իհարկե, կատարվել էին դեպքեր, որոնք հասարակական լուրջ արձագանք ունեն, եւ ճիշտ կլիներ, որ ԱԺ ղեկավարությունն ինքը նախ բարձրաձայներ այդ մասին»,- այսօր «Ժառանգություն» խմբակցության ղեկավար Ռուբեն Հակոբյանն այսպիսի հայտարարություն արեց ԱԺ ամբիոնի մոտ՝ էլեկտրաէներգիայի թանկացման դեմ բողոքի ակցիայի մասնակիցների նկատմամբ կիրառված բռնությունների առնչությամբ:
Գալուստ Սահակյանը, լսելով նրան՝ ձեռքը տնկելով՝ ասաց. «Ի՞նձ եք խորհուրդ տալիս, լսե՛ք, ձեր խորհուրդները ձե՛զ պահեք»: Նա ԱԺ կանոնակարգի մասին հիշեցրեց, իսկ Ռուբեն Հակոբյանը բարկացավ. «Ես ձեզ ասում եմ թույլ տվեք խոսել: Ես տեղյակ եմ ԱԺ կանոնակարգից ավելի, քան դուք: Մի՛ սրեք իրավիճակը, դուք բոլորից շատ եք սրում իրավիճակը»:
Գալուստ Սահակյանն էլ հեգնեց՝ պատգամավորի հետ խոսելիս միանգամից անցնելով դու-ի. «Եթե դու մտածում ես դու էնքան ես, որ քեզանով պտի սրվի՞…»: Ռուբեն Հակոբյանը սկսեց վիճել՝ բարձր տոնով. «Վե՛րջ տվեք ձեր այդ պրակտիկային: Ես գիտեմ որտեղ եմ գտնվում, ովքեր չգիտեն սա ինչ է, կխնդրեմ կարդալ կանոնակարգը, պառլամենտական մշակույթին տեղյակ լինեն, որպեսզի իզուր տեղը չլարեն իրավիճակը: Գլխավոր լարողն այսօր դո՛ւք եք: Չե՛ք տիրապետում ո՛չ կանոնակարգին, ոչ էլ պառլամենտական մշակույթին»:
Գալուստ Սահակյանն արձագանքեց. «Ձեզ կզրկեմ խոսքից, որովհետեւ լեզվին եք տալիս, ոչ թե մտքին»:
Կարդացեք նաև
Ռուբեն Հակոբյանն էլ՝ թե «Ես շատ բան ունեմ տալու, բայց թույլ տվեք խոսեմ: Այս մարմինն ու այս ամբիոնը թանկ է ինձ համար»:
Ըստ Ռուբեն Հակոբյանի, ժողովուրդը շատ լավ հասկանում է, որ եթե էլեկտրաէներգիայի սակագնի բարձրացման հետ կապված խոսք է գնում չարաշահումների մասին եւ իշխանությունը որեւէ քայլ չի անում, նշանակում է՝ ինչ-որ բան այն չի. «Մենք պիտի կարողանանք այստեղ քննարկենք, եթե չենք քննարկում՝ ժողովուրդը գնում է փողոց եւ կարող է գնալ նաեւ անօրինական քայլերի: Մենք պիտի կանխենք այստեղ, ոչ թե եթե դուրներս չի գալիս, պիտի փակենք խոսափողները»:
Հռիփսիմե ՋԵԲԵՋՅԱՆ
