«Այն, ինչ ժամեր առաջ տեղի ունեցավ Բաղրամյան փողոցում՝ բոլորիս է հայտնի, հիմա կարելի է խելոք դեմք ընդունել և ասել, թե ճիշտ կլիներ, որ բանակցեին, ճիշտ կլիներ, որ վերադառնային, Ազատության հրապարակ, բայց դրանք հարցի մի կողմ են: Կարևորը այն էր, որ հավաքված էին մեր երիտասարդությունը, գիտակից երիտասարդությունը, նրանք առավելագույնս կազմակերպված էին, խաղաղ էին, օրինապահ էին և կատարվածը դատապարտելի է»,- այս մասին Ազգային ժողովում լրագրողների հետ զրույցում ասաց ՀՅԴ խմբակցության քարտուղար Աղվան Վարդանյանն`անդրադառնալով լուսադեմին, Բաղրամյան պողոտայում ոստիկանության կողմից խաղաղ ցուցարարների հանդեպ կիրառված բռնություններին:
«Մենք պետք է պահանջենք, որ ժամ առաջ բերման ենթարկվածները ազատ արձակվեն և իշխանությունները հաշվի նստեն գիտակից, մտածող քաղաքացիների հետ»,- հավելեց նա:
Aravot.am-ի հարցին`ինչո՞ւ քաղաքական ուժերը Բաղրամյան փողոցում չէին, Աղվան Վարդանյանը պատասխանեց. «Առաջին դեպքը չէ, որ քաղաքացիական հասարակությունն իր նախաձեռնությամբ է հանդես գալիս և մենք մեր տեսակետը էլեկտրաէներգիայի հետ կապված մշտապես արտահայտել ենք, դա եղել է երկկողմանի դիրքորոշում և մենք ուշադիր հետևել ենք և պարտադիր չէ, որ քաղաքական ուժերը այնտեղ լինեին, մենք ամբողջովին պաշտպանում էինք, այդ դիրքորոշումը»:
Իսկ ի՞նչ է պատրաստվում անել ՀՅԴ-ն`խորհրդարանի շրջանակներում` հարցին, նա ասաց, որ նիստի ընդմիջմանն ԱԺ նախագահ Գալուստ Սահակյանի մոտ հրավիրված է խորհրդակցություն և այն, ինչ կարող է օրենքի սահմանում անել Ազգային ժողովը՝ իրենք անելու են:
Կարդացեք նաև
Մանրամասները` տեսանյութում
Նելլի ԳՐԻԳՈՐՅԱՆ
