«Մենք շատ ծանր վիճակի մեջ ենք, շատ ավելի ծանր, քան կարող է թվալ»,- հունիսի 22-ին Միջազգային եւ անվտանգության հարցերի հայկական ինստիտուտի «Ռուսաստանի «ինտեգրացիոն նախագիծն» ու դրա հարուցած ճգնաժամերը» թեմայով փորձագիտական կլոր սեղանի ընթացքում ասաց «Մոդուս վիվենդի» կենտրոնի ղեկավար Արա Պապյանը:
Նրա խոսքերով՝ ստեղծված իրավիճակում առանձնապես կտրուկ շարժումներ պետք չէ անել. «Որովհետեւ այնքան մեծ է ամբողջ խաղը եւ մեր դերակատարությունն այնքան փոքր է, որ մենք պետք է փորձենք հասկանալ եւ մեր իշխանությունները նույնպես պետք է հասկանան, թե այդ միտումներն ո՞ւր են գնում, որովհետեւ ակնհայտ է, որ կյանքը վատանալու է. էլեկտրաէներգիան է թանկանում, բենզինն է թանկանում, այդ բոլորը բերելու է թանկացման: Այս խնդիրները կան, մենք ինչքանո՞վ կկարողանանք այս խնդիրները լուծել, եւ այն, որ մենք Արեւմուտքի հետ սկսել ենք ավելի կտրուկ մերձենալ, պայմանավորված է ֆինանսական խնդիրներով, որովհետեւ ոչ մի ֆինանսական ակնկալիք չարդարացավ: Հարցրե՛ք գործող գործարարներին, լաց են լինելու. Ամեն տեղ 20-30 տոկոս կրճատում է, եւ այդ միտումը շարունակվում է: Եթե էլեկտրաէներգիան թանկանա մենք ունենալու ենք հազարավոր փակված տնտեսվարողների օբյեկտներ, որն իր հետեւանքներն է ունենալու»:
Արա Պապյանը նշեց, որ Հայաստանը պետք է չշտապի եւ իշխանությունները պետք է փորձեն լեզու գտնել Արեւմուտքի հետ՝ ստեղծված տնտեսական վիճակից դուրս գալու համար:
Ամի ՉԻՉԱԿՅԱՆ
