Ամռանը դդմիկով կոտլետը, երեւի թե, բոլոր ընտանիքներում շատ հաճախ պատրաստվող կերակրատեսակներից է: Որպեսզի չհոգնենք միօրինակությունից՝ երբեմն կարելի է ինչ-որ նոր երանգներ ավելացնել մեզ լավ ծանոթ ուտելիքներին:
Անհրաժեշտ մթերքները
Դդմիկ- 1,5 կգ
Կանաչ սոխ- կես կապ
Սխտոր- 3 պճեղ
Համեմ- կես կապ
Մաղադանոս-կես կապ
Անանուխ կամ թարխուն- մի քանի ճյուղ
Թարմ կարմիր պղպեղ- 1 հատ
Պահածոյացված եգիպտացորեն- 1 փոքրիկ տուփ
Տարբեր համեմունքներ՝ կեսական թեյի գդալ (քըրքում կամ շաֆրան, սունելի, համեմի աղացած սերմ, աղացած կարմիր եւ սեւ պղպեղներ եւ այլն)
Չորացրած անանուխ-1 ճաշի գդալ
Աղ- 1 ճաշի գդալ (ոչ լիքը)
Ձու- 1 հատ
Ալյուր- 4 ճաշի գդալ
Բուսական յուղ- տապակելու համար, մոտ 1 բաժակ
Պատրաստման եղանակը
Կարդացեք նաև
Դդմիկները լվանալ, եւ եթե թարմ են, առանց կեղեւելու քերել: Կարող եք դդմիկները միանգամից քերել թանզիֆի (марля)-ի մեջ: Ապա շատ լավ քամեք թանզիֆը եւ ազատվեք դդմիկի դուրս տված ջրից:
Ավելացրեք մնացած բոլոր բաղադրիչները, բնականաբար՝ կանաչին եւ պղպեղը հարկավոր է լավ լվանալ, չորացնել եւ մանր կտրատել, սխտորը՝ քերել կամ ճզմել:
Եթե, այնուամենայնիվ, չնայած լավ քամելուն, զգաք, որ ձեր կոտլետային զանգվածը շատ ջրիկ է, մի փոքր էլ ալյուր ավելացրեք:
Լավ տաքացրած թավայի մեջ լցրեք բուսական յուղը, թողեք դա էլ լավ տաքանա, ապա գդալով լցրեք կոտլետները: Տապակեք երկու կողմից երեքական րոպե՝ մինչեւ լավ կարմրի: Կրակը պետք է լինի ոչ շատ բարձր, որպեսզի կոտլետների մեջը նույնպես հասցնի եփվել, ոչ էլ շատ ցածր, որպեսզի կոտլետները չկպչեն թավային: Պատրաստի կոտլետները հանեք թավայից եւ դրեք մատուցարանի վրա, որի վրա թղթե անձեռոցիկներ են դրված, դրանք կօգնեն ազատվելու ավելորդ ձեթից:
Եթե զգաք, որ բուսական յուղը թավայի մեջ պակասում է, ավելացրեք յուղը միայն այն դեպքում, երբ թավայի մեջ ոչ մի կոտլետ չկա, թողեք տաքանա, նոր դրեք կոտլետները թավայի մեջ:
Դդմիկով կոտլետները շատ համով են քամած մածունի թանձրուկով (1 բաժակ քամած մածուն + 1 ճաշի գդալ ձիթապտղի յուղ + 1 ճաշի գդալ կիտրոնի հյութ + 1 պճեղ ճզմած սխտոր+ 1 պտղունց չորացրած անանուխ):
Բարի ախորժակ:
Պատրաստեց ՄԵԼԱՆՅԱ ԲԱՐՍԵՂՅԱՆԸ
«Առավոտ»
20.06.2015
