Չնայած ՀՀ ոստիկանապետ Վլադիմիր Գասպարյանն ամենուր հայտարարում է, որ ոստիկանները բարեփոխվել են, իրենց համակարգում այլեւս տեղ չունեն ծեծող- ջարդողները, անհարգալից բառեր օգտագործողները, այսօր Շիրակի մարզի վերանշանակված փոխոստիկանապետ Վահրամ Ենգոյանը ողջ Գյումրիի առաջ խայտառակեց իր շեֆին: Գնդապետ Վահրամ Ենոգյանը, փակելով Գյումրու կենտրոնական Սայաթ-Նովա փողոցը, որտեղից անցնում էին հոսանքի թանկացման դեմ մեքենաներով ու հեծանիվներով երթի դուրս եկած գյումրեցի երիտասարդները, կանգնեցրեց մեքենաները ՝ փորձելով չթույլատրել անցնել փողոցով: Այնուհետ նա հրեց ու անհարգալից բառերով վիրավորեց տնտեսագետ, Երեւանի տնտեսագիտական համալսարանի Գյումրու մասնաճյուղի դասախոս Կարեն Պետրոսյանին: Նրան «թափթփուկ» անվանեց: Կարեն Պետրոսյանը հակադարձեց ասելով. «Դուք եք հա՞ էս երկրի գնդապետը, այդ ի՞նչ բառապաշարով եք խոսում»:
Վահրամ Ենգոյանը չնահանջեց, իր աշխատակցին պարտադրում էր ապօրինի գործողություն կատարել, այն է՝ ակտ գրել ու Կարեն Պետրոսյանի մեքենան տանել տուգանային հրապարակ: Կարեն Պետրոսյանը պահանջում էր ցույց տալ իր մեքենան տուգանային հրապարակ տանելու հիմքը: Ոստիկանը չկատարեց Վահրամ Ենոգյանի հրահանգը՝ ասելով. «Ես արձանագրություն չեմ կազմի՝ առանց փաստաթղթերի»:
Իսկ Վահրամ Ենոգյանը հրահանգում էր ոստիկանին արձանագրել, որ Կարեն Պետրոսյանը փաստաթղթերը չի ներկայացնում: Ոստիկանը հակաճառեց ասելով՝ ինչի՞ հիման վրա: Կարեն Պետրոսյանը դիմելով շարքային ոստիկանին, ասաց, թե ցույց կտա իր փաստաթղթերը, եթե գնդապետը չխոչընդոտի մարդկանց ազատ տեղաշարժվելու իրավունքը:
Կարդացեք նաև
Վիճակը հարթեց Շիրակի մյուս փոխոստիկանապետը՝ Աշոտ Գրիգորյանը: Նա կարողացավ լեզու գտնել երթի մասնակից երիտասարդների հետ, հանդարտեցնել նրանց, որոնք զայրացած Վահրամ Ենգոյանի պահվածքից ու օգտագործած բառերից, բացականչում էին. «Ամոթ, ամոթ»:
Հիշեցնենք, որ Վլադիմիր Գասպարյանը 1,5 տարի առաջ այս փոխոստիկանապետին որպես բիրտ ոստիկանի, հեռացրել էր աշխատանքից՝ նրան դաժանաբար քննադատելով, իսկ վերջերս նորից վերանշանակեց իր հին պաշտոնին:
Նունե ԱՐԵՎՇԱՏՅԱՆ
