Լինքսի տնօրեն Դենիս Սամութը հունիսի 20-ին 89-րդ «Ռոուզ-Ռոթ» սեմինարի ընթացքում Հարավային Կովկասի երկրներից առանձնացրեց Վրաստանին, որտեղ իշխող կուսակցությունը 2012 թվականին իշխանությունը թողեց խաղաղ եղանակով:
«Սա քաղաքական անցման փոփոխության օրինակ է, որը օրինակելի պետք է լինի ամբողջ տարածաշրջանի համար: Եվրոպայում դա անընդհատ լինում է, սա առօրյա է Եվրոպայում, բայց տարածաշրջանի համար այն, որ մեկ կուսակցությունը պարտվելով խաղաղ կերպով զիջի իշխանությունը հենանշանային նշանակություն ունի: Սա մի երեւույթ է, որը պետք է նորմալ դառնա տարածաշրջանում»,- ասաց նա:
Նա նկատեց, որ հասարակական կազմակերպությունները Վրաստանում 1993-1994 թվականներից գործել են, իսկ Ադրբեջանում դա տեղի չի ունեցել: Դենիս Սամութն ընդգծեց, որ Ադրբեջանում Եվրամիության պատվիրակությունը 2005 թվականից հետո է սկսել գործել, նույն վիճակը Հայաստանում է. «Բայց Հայաստանը ուներ սփյուռք, որը այդ բացը լրացնում էր, հետեւաբար՝ քաղաքացիական հասարակության զարգացման խնդիրը կարեւոր է, որը տեղի է ունենում Հայաստանում»:
Դենիս Սամութի կարծիքով՝ Հայաստանի ուժեղ կողմերից մեկն այն է, որ վերջին խորհրդարանական ընտրությունների ընթացքում բազմակարծություն է հաստատվել՝ ի տարբերությունը Ադրբեջանին. «Սա շատ լավ հիմք է Հայաստանի համար, եթե Ադրբեջանը ցանկանում է, ապա պետք է ճիշտ կերպով իրականացնի խորհրդարանական ընտրությունները»:
Կարդացեք նաև
Ամի ՉԻՉԱԿՅԱՆ
