«Հարավային Կովկասի երեք երկրներն էլ ունեն ընդհանուր պատմական անցյալ, վերջին տասնամյակների մասին է խոսքը»,- հունիսի 20-ին 89-րդ «Ռոուզ-Ռոթ» սեմինարի ընթացքում ասաց Լինքսի տնօրեն Դենիս Սամութը:
Նա նկատեց, որ ինչ որ կատարվում է երկրներից մեկում, մյուս երկրները այն մանրակրկիտ ուսումնասիրում են, օրինակ՝ Վրաստանում տեղի ունեցած պատահարը: Նա նշեց՝ երբ լրատվամիջոցները ցույց էին տալիս, թե ինչպես են վրացի նախարարներն իրենց օգնությունը ցուցաբերում, Ադրբեջանում քննարկում էին, թե արդյոք իրենց նախարարները նման կերպ կվարվեի՞ն, թե՞ ոչ:
«Մեծ բաց կա քաղաքական գործընթացներում: Մի բաց, որն ամբողջությամբ չի լրացվել այդ բացը կուսակցությունների թուլությունն է եւ կուսակցությունների զարգացման տեսանկյունից գործընթացը չի ավարտվել»,- ասաց նա:
Դենիս Սամութն ասաց, որ Հարավային Կովկասն մինչեւ օրս ենթակա է արտաքին ազդեցությունների եւ առկա հակամարտություններն անդրադարձել են նաեւ քաղաքական գործընթացներին: Նա նկատեց այն հանգամանքը, որ Ադրբեջանը ներկայացնող պատվիրակությունը չի մասնակցում սեմինարին, ըստ նրա՝ դա ցավալի երեւույթ է:
Կարդացեք նաև
Նա Ադրբեջանում առանձնացրեց մի գործընթաց, որը սկսվել է 2013 թվականի աշնանից, երբ Ռուսաստանի նախագահ Վլադիմիր Պուտինն այցելել է Բաքու: Նա հիշեցրեց, որ դրանից մի քանի օր հետո Իլհամ Ալիեւը որպես նախագահ է վերընտրվել, եւ այդ ժամանակ միջազգային դիտորդները քննադատություններով են հանդես եկել. «Դրանից հետո մենք քաղաքացիական հասարակության եւ լրատվամիջոցների նկատմամբ նոր ճնշման ականատես եղանք»:
Դենիս Սամութը նշեց, որ ճնշումների հիմնական թիրախն Ադրբեջանում մարդու իրավունքի ոլորտի ակտիվիստներն են. «Այս ճնշումներն անդրադարձավ քաղաքացիական հասարակության վրա, շատերը լքեցին Ադրբեջանը: Շատերը վախի մթնոլորտում են ապրում, ես կուզեի ասել, որ դա ցավալի է»:
Դենիս Սամութը կարծում է, որ հասնում ենք մի կետի, որտեղից խնդիրը գոյատեւել չի կարող. չնայած վախին՝ շատ մարդիկ են հարցականի տակ դնում այդ քաղաքականության: Նա նկատեց, որ Ադրբեջանն ինքն իրեն է դրել այդ վիճակում:
Սակայն, ըստ նրա, Ադրբեջանի համար նոր ցիկլ է սկսվում՝ խորհրդարանական ընտրությունների տեսքով: Նա համարում է՝ դա Ադրբեջանի համար լավ հնարավորություն է ցույց տալու, որ իր քաղաքականության ուղղությունը փոխում է: Սակայն Դենիս Սամութն այնքան էլ լավատես չէ. «Ես կցանկանայի նաեւ ասել Ադրբեջանի մասին, որ չնայած այս ամենին՝ մենք պետք է գնահատենք դրվատականի խոսքերով, որ այդ երկրում տեղ կա ընդդիմության համար, թեկուզ շատ սահմանափակ: Պետք է ողջամիտ կերպով քննադատել Ադրբեջանին, զգացմունքային քննադատությունը ոչ ոքի չի օգնելու»:
Ամի ՉԻՉԱԿՅԱՆ
