Երեկ, այս «նեղ մաջալին», երբ էլեկտրաէներգիան նոր են թանկացրել, կառավարությունը ԱԺ էր բերել «Ակցիզային հարկի» մասին օրենքում փոփոխություններ կատարելու մասին բավականին աղմկահարույց նախագիծ եւ առաջարկում էր բարձրացնել ծխախոտի, օղու, բենզինի, գազի ակցիզային հարկի դրույքաչափերը, որը բերելու է այդ ապրանքների թանկացման:
Ուշագրավ էր, որ քննարկման ժամանակ ՀՀԿ-ական պատգամավորները սկսեցին ընդդիմադիրներից ավելի սուր քննադատության ենթարկել կառավարության նախագիծը: Եվ այսօր արդեն պատգամավորները պետք է առաջին ընթերցմամբ նախագիծը քվեարկության դնեն:
«Առավոտը» ՀՀԿ պատգամավոր Արտակ Դավթյանից հետաքրքրվեց՝ հնարավո՞ր է, որ ՀՀԿ-ականները տապալեն կառավարության նախագիծը: Նա պատասխանեց. «ՀՀԿ-ականի նպատակն ամենեւին այս կամ այն նախագիծը տապալելը չէ: ՀՀԿ-ականների նպատակն ավելի կշռված եւ արդյունքի միտված նախագծեր ընդունելն է: Այս նախագծում հիմնավորումները կաղում են: Խնդիրը դրանում է, որ եթե դու կատարում ես քայլ, պետք է ունենաս որոշակի նպատակներ. այդ ի՞նչ բարի նպատակներ են՝ բացեք փակագծերը, հասկանանք նպատակները»:
Կարդացեք նաև
«Առավոտ» օրաթերթ
19.06.2015
