Էստոնիայի կրթության նախարարությունն իր կրթական հաստատություններում ուսումնական աշխատանքներ կանցկացնի, որոնց նպատակն է կանխել ուսուցիչների եւ աշակերտների «անօրինական» մուտքը Լեռնային Ղարաբաղ: «Trend.az»-ը, հղում կատարելով Ադրբեջանի կրթության նախարարությանը, նշել է, որ այս մասին Ադրբեջանի կրթության նախարար Միքայիլ Ջաբբարովի հետ հանդիպմանն ասել է Էստոնիայի կրթության նախարարության գլխավոր քարտուղարի տեղակալ Մադիս Լեպայոյեն:
Միքայիլ Ջաբբարովը նշել է, որ այս տարվա մայիս ամսին Էստոնիայի Տարտուի համալսարանի դասախոսների եւ ուսանողների «անօրինական» այցը Լեռնային Ղարաբաղ չեն համապատասխանում երկու հանրապետությունների բարեկամական հարաբերությունների ոգուն եւ հույս է հայտնել, որ նման բան ապագայում չի կատարվի:
Մադիս Լեպայոյեն էլ իր հերթին ցավ է հայտնել այցելության համար եւ ասել, որ Տարտուի համալսարանի ռեկտորը նամակ է ուղարկել Էստոնիայում Ադրբեջանի դեսպանատուն, որում ցավ է հայտնել եւ նշել, որ նմանատիպ միջադեպները կանխարգելելու համար ապագայում համապատասխան աշխատանքներ կանցկացվեն այդ երկրի համալսարաններում:
Պատրաստեց Աշոտ ԻՍՐԱԵԼՅԱՆԸ
