Փակ և գաղտնի քվեարկության արդյունքում ԵՊՀ ռեկտորի պաշտոնում միաձայն ընտրվեց ներկայիս ռեկտորի ժամանակավոր պաշտոնակատար Արամ Սիմոնյանը: Նա ՀՀ ԳԱԱ թղթակից անդամ է, պատմ. գիտ. դոկտոր, պրոֆեսոր:
Հիշեցնենք, որ այս պաշտոնի համար միայն նա էր հայտ ներկայացրել:
Ընտրությունից հետո՝ լրագրողների հետ հանդիպման ժամանակ, Արամ Սիմոնյանը դժվարացավ պատասխանել հարցին, թե ինչու է ինքը միակ թեկնածուն. «Ազատ մրցույթ էր, ու իր տվյալներով համապատասխանող յուրաքանչյուր մարդ կարող էր առաջադրել իր թեկնածությունը: Ես չեմ կասկածում, որ թե´ համալսարանում, թե´ դրանից դուրս արժանի մարդիկ շատ կան: Բայց թե ինչու չեն դիմել, ես չեմ կարող ասել, որովհետև, կրկնում եմ, մրցույթն ազատ էր, գործերն ընդունող հանձնաժողովն ամեն օր աշխատել է, և որևէ արգելք, թերացում այս հարցում չէր կարող լինել ու չի էլ եղել»,- վստահեցրեց նա:
Արամ Սիմոնյանի փոխանցմամբ՝ քվեարկությանը 32 հոգուց ներկա են եղել 30-ը. «Գագիկ Հարությունյանն ու Հրանուշ Հակոբյանը արտասահմանյան գործուղման են և նախօրոք տեղեկացրել են, որ չեն մասնակցելու»,- ասաց ռեկտորը:
Կարդացեք նաև
«Ես արդեն ինը տարի է՝ ԵՊՀ ռեկտոր եմ, բայց ընտրությունը մնում է ընտրություն, որի արդյունքներն անկանխատեսելի են լինում սովորաբար: Եվ ես շատ ուրախ եմ, որ ինձ վստահվեց այս պաշտոնում ևս հինգ տարի աշխատել: Հպարտ եմ, որ հոգաբարձուների խորհրդի բարեհաճ վերաբերմունքն ու վստահությունը ունեմ. ձայների քանակը դրա մասին է խոսում: Քվեարկության այսպիսի արդյունքը նշանակում է, որ ես վատ չեմ աշխատել այս տարիներին, և վատ չի աշխատել նաև ինձ հետ աշխատած թիմը: Բայց դա նաև շատ պարտավորեցնող է, որովհետև մենք ապրում ենք շատ լուրջ մարտահրավերների ժամանակաշրջանում»,- ասաց Սիմոնյանը:
Ինչ վերաբերում է առաջիկա հինգ տարիների անելիքներին՝ ռեկտորն ասաց, որ պետք է շատ նպատակասլաց աշխատեն, որպեսզի ԵՊՀ-ն հետազոտական համալսարանի վերածվելու ճանապարհին կարողանա շատ լուրջ քայլ անել. «Շարունակելու ենք զարգացնել նաև ուսանողակենտրոն ուսուցումը, հիմնովին և անընդհատ փոխելու ենք կրթական ծրագրերը, դրանց բովանդակությունը, շարունակելու ենք կատարելագործել ուսանողների գիտելիքների և հմտությունների գնահատման համակարգը, կրթության որակն ապահովող և վերահսկող մեխանիզմների շարունակական կատարելագործումը և այլն, և այլն»,- նշեց Սիմոնյանը՝ հավելելով, որ առաջիկայում չի նախատեսվում ուսման վարձավճարների բարձրացում:
Նշենք, որ հոգաբարձուների խորհրդի նիստին մասնակցում էր նաև ԵՊՀ հոգաբարձուների խորհրդի նախագահ, ՀՀ նախագահ Սերժ Սարգսյանը:
Սիրանուշ ՀԱՅՐԱՊԵՏՅԱՆ
