«ՆԱՏՕ-ի հետ համագործակցությունը Հայաստանի համար անփոխարելի ու առանցքային նշանակություն ունի»,-հունիսի 19-ին 89-րդ «Ռոուզ-Ռոթ» սեմինարի ընթացքում հայտարարեց 1992-95թթ. ՀՀ նախագահի հատուկ հանձնարարություններով դեսպան, 1994-95թթ. Հայաստանի ԱԱԾ ղեկավար, Տարածաշրջանային հետազոտությունների կենտրոնի առաջատար փորձագետ Դավիթ Շահնազարյանը:
Նա նկատեց, որ Հայաստանը, լինելով ՀԱՊԿ-ի անդամ, իր հարաբերությունները խորացնում է Եվրամիության եւ ՆԱՏՕ-ի հետ: Անդրադառնալով Հայաստանի՝ Եվրասիական տնտեսական միություն անդամակցությանը՝ Դավիթ Շահնազարյանն ասաց, որ դա չի եղել ո՛չ Հայաստանի, ո՛չ հայ ժողովրդի որոշումը, այն կատարվել է Ռուսաստանի ճնշման տակ: Նա հավելեց, որ այդ ճնշման մի մասը ռուս գործիչները հրապարակայնորեն տարածել են մամուլով: Սակայն Դավիթ Շահնազարյանը չի բացառում, որ Սերժ Սարգսյանը այդ ժամանակ այլընտրանք չուներ, եւ որ Հայաստանի չանդամակցումը կբերեր նորանոր սպառնալիքների: Նա նաեւ նկատեց, որ չնայած մի քանի ամիս է Հայաստանը անդամակցել է ԵՏՄ-ին, բայց նրա անվտանգությունը չի ավելացել, իսկ տնտեսական վիճակը գնալով վատթարանում է:
Դավիթ Շահնազարյանը հայտարարեց, որ սատարում է Եվրամիության եւ ՆԱՏՕ-ի հետ հարաբերությունները խորացնելու գործընթացին եւ վստահ է, որ ՆԱՏՕ-ի հետ հարաբերությունների խորացմամբ Հայաստանը կվերանվաճի Ռուսաստանի հարգանքը: Նա նշեց, որ Ռուսաստանը Մինսկի խմբին զուգահեռ փորձում է ինքնուրույն գործունեություն ծավալել, եւ այս վիճակում չափազանց կարեւոր է, որ միջազգային հանրությունը սատարի Մինսկի խմբին:
Ամի ՉԻՉԱԿՅԱՆ
