89-րդ «Ռոուզ-Ռոթ» սեմինարի ընթացքում Չեխիայի պատվիրակության անդամ Միլան Սարապատկան հետաքրքրվեց ՀՀ արտաքին գործերի նախարարի տեղակալ Աշոտ Հովակիմյանից, թե արդյոք ժամանակը Հայաստանի դե՞մ է խաղում, եւ Հայաստանը պատրա՞ստ է վերադարձնել գրավյալ տարածքները:
Աշոտ Հովակիմյանը պատասխանեց. եթե հակամարտության կարգավորման հարցերը չեն քննարկվում խաղաղ պայմաններում, ապա ժամանակն անբավարար է ոչ թե մեկ երկրի, այլ տարածաշրջանի բոլոր երկրների համար. «Կան սկզբունքներ հակամարտության կարգավորման մասին, կան պարագաներ, որոնք թույլ չեն տալիս կարգավորումը: Միջազգային իրավունքի միայն մեկ սկզբունքով անհնար է խնդիրը կարգավորել: Դա փոխզիջում չէ, դա միակողմանի լուծում է, դա հակամարտության միայն մեկ կողմի լուծումն է, եւ եթե շարունակենք այս կերպ, մենք երբեք փոխզիջման չենք հասնի: Այստեղ երեւում է միջնորդների դերը, որոնք շեշտում են, թե արդյունավետության համար շատ կարեւոր է համակողմանիությունը: Համակողմանիություն եւ փոխզիջում, սա է կարեւորը»:
Անդրադառնալով ԵԱՀԿ Մինսկի խմբի ֆրանսիացի նախկին համանախագահ Ժակ Ֆորի կարծիքին, թե երկու երկրներում քաղաքական կամքը բացակայում է, Աշոտ Հովակիմյանն ասաց. «Հայկական կողմն ունի քաղաքական կամք, մենք ապացուցել ենք դա՝ ողջունելով Մինսկի խմբի համանախագահների ջանքերը եւ նրանց առաջարկած լուծումները: Եթե մենք խոսում ենք քաղաքական կամքի մասին, Հայաստանն այստեղ խնդիր չունի»:
Ամի ՉԻՉԱԿՅԱՆ
