Գյումրիում տեղակայված ռուսական 102-րդ ռազմաբազայի ժամկետային զինծառայող, հունիսի 15-ին սպանված 19-ամյա Իվան Նովիկովի սպանության գործի նախաքննությունը ՀՀ քննչական կոմիտեն ավարտված է համարել եւ այն ուղարկել դատախազության։ Այս մասին երեկ ասացին Գլխավոր դատախազության հանրային կապերի բաժնից։
ՀՀ գլխավոր դատախազությունից ասացին նաեւ, որ ռուսական կողմը գրությամբ դիմել է Քննչական կոմիտեին՝ խնդրելով իրենց տրամադրել հայ իրավապահների կողմից հարուցված քրեական գործը իրենց գործին միացնելու նպատակով։
Գլխավոր դատախազությունից նաեւ մանրամասներ ներկայացրեցին ռուսական կողմի գրությունից, որում, մասնավորապես, ասվում է. «Սույն թվականի հունիսի 15-ին ՀՀ քննչական կոմիտեի Շիրակի մարզային քննչական վարչություն է ստացվել Ռուսաստանի Դաշնության քննչական կոմիտեի զինվորական քննչական վարչության 519-րդ զինվորական քննչական բաժնի գրությունը, ինչի համաձայն՝ նշված բաժնի վարույթում ՌԴ քրեական օրենսգրքի 105-րդ հոդվածի 1-ին մասի հատկանիշներով (սպանություն) քննվում է քրեական գործ, որի նախաքննության ընթացքում հաստատվել է Ռուսաստանի Դաշնության 102-րդ ռազմական բազայի շարքային զինծառայող Իվան Ս. Նովիկովի սպանությանը վերջինիս համածառայակից ընկերոջ՝ պայմանագրային զինծառայող Իվան Վ.Բոսխոմջիեւի առնչությունը, ով ձերբակալվել է եւ դեպքի կապակցությամբ տվել է ինքնախոստովանական ցուցմունքներ։ Ռուսաստանի Դաշնության քննչական կոմիտեի զինվորական քննչական վարչության 519-րդ զինվորական քննչական բաժինը, ղեկավարվելով ՌԴ-ի ե ՀՀ-ի միջեւ կնքված «Հայաստանի Հանրապետության տարածքում ռուսական ռազմական բազայի տեղակայման հետ կապված գործերով իրավասության եւ փոխադարձ իրավական օգնության հարցերով» համաձայնագրի 3-րդ եւ 5-րդ հոդվածների պահանջներով, վերոհիշյալ գրությամբ խնդրել է տրամադրել ՀՀ քննչական կոմիտեի Շիրակի մարզային քննչական վարչության վարույթում նույն դեպքի առթիվ հարուցված եւ քննվող քրեական գործը դեպքի վայրի զննությամբ առգրավված առարկաների եւ Իվան Ս. Նովիկովի դիակի հետ միասին՝ իրենց վարույթում քննվող քրեական գործին միացնելու նպատակով»:
Տաթեւ ԽԱՉԱՏՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
