Հայաստան այցից հետո Եվրոպայի խորհրդի խորհրդարանական վեհաժողովի (ԵԽԽՎ) Մոնիտորինգի հանձնաժողովի Հայաստանի հարցով համազեկուցողներ Աքսել Ֆիշերը եւ Ալան Միլը ուշագրավ հայտարարությամբ են հանդես եկել: Նրանք կարեւորել են այն, որ «սահմանադրական բարեփոխումների հիմնական նպատակները պետք է լինեն քաղաքական բազմակարծությունն ամրապնդելը, Ազգային ժողովի առաջ կառավարության հաշվետվողականության բարձրացումը եւ քաղաքական համակարգին հասարակության վստահությունը»:
Սակայն անզեն աչքով էլ ակնհայտ է, որ ՀՀ քաղաքական դաշտում այս պահի դրությամբ բազմակարծություն եւ կոնսոլիդացիա, որի մասին բազմիցս շեշտել է Վենետիկի հանձնաժողովը, ապահովված չէ: Քաղաքական մի շարք խաղացողներ, օրինակ՝ ՀԱԿ-ը, «Ժառանգությունը», ԲՀԿ-ն, դեմ են սահմանադրական փոփոխություններին, նրանցից որոշները ընդհանրապես հրաժարվում են այս հարցով քննարկումների մասնակցել, սակայն անգամ այս պարագայում ՀՀ իշխանությունները համառ են առաջ տանել ու ավարտին հասցնել սահմանադրական փոփոխությունները, մինչեւ անգամ արդեն տարբեր հայտարարություններից պարզ է դառնում, որ հնարավոր է՝ նոյեմբերին անցկացվի այս հարցով հանրաքվե:
Ուստի հարց է ծագում՝ Սերժ Սարգսյանն ինչպե՞ս պետք է վարվի, որ կարողանա ե՛ւ իր վերարտադրության հարցերը լուծել, ե՛ւ ԵԽԽՎ-ի հետ հարաբերությունները բարելավել:
Կարդացեք նաև
«Առավոտ» օրաթերթ
18.06.2015
