Հայաստանի կողմից Ղարաբաղն օկուպացնելու մասին ԵԽԽՎ-ում հնչած հայտարարությունը վերջին օրերին ՀՀ քաղաքական դաշտում լուրջ մտահոգություններ էր առաջացրել: «Առավոտը» ՀՀ ԱԺ ԲՀԿ խմբակցության ղեկավար, ԵԽԽՎ-ում հայկական պատվիրակության անդամ Նաիրա Զոհրաբյանից հետաքրքրվեց՝ արդյոք հայկական պատվիրակության թերացումը չէ՞ր սա: Նա նշեց, թե այս հարցով մամուլում թյուրիմացություն եւ ապատեղեկատվություն է սպրդել: Տիկին Զոհրաբյանը պարզաբանեց, որ ԵԽԽՎ-ում քննարկվել է «Ադրբեջանում ժողովրդավարական ինստիտուտների գործունեության մասին» զեկույցը, որում հղում է կատարվել մեկ այլ զեկույցի` «Լեռնային Ղարաբաղում եւ Ադրբեջանի մյուս օկուպացված տարածքներում բռնությունների աճ» վերնագրով: Տիկին Զոհրաբյանը նաեւ տեղեկացրեց, թե այս զեկույցի պատրաստման աշխատանքներն այժմ կասեցված են, քանի որ այն չունի զեկուցող: Նշենք, որ որպես զեկուցող էր ընտրվել անգլիացի պատվիրակ Ռոբերտ Վալտերը, սակայն տիկին Զոհրաբյանը տեղեկացրեց, որ նա այժմ պատգամավորի մանդատից Մեծ Բրիտանիայում զրկվել է, ուստի միայն եթե նա դառնա լորդ, այդ պարագայում կարող է կրկին ստանձնել զեկուցողի դերակատարությունը, ինչը քիչ հավանական է: Նաիրա Զոհրաբյանի տեղեկացմամբ՝ եթե զեկուցող էլ ընտրվի, ապա զեկույցի վերջնական տեսքի մասին կարող ենք խոսել միայն 1-1,5 տարի հետո:
Դառնալով քննադատություններին՝ տիկին Զոհրաբյանը եզրափակեց. «Եթե որեւէ մեկը խորհրդարանում կարողանա աշխատել ներկայիս Ստրասբուրգում, որի քաղաքական վերնախավը գնված է Ադրբեջանի կողմից, ես պատրաստ եմ ԲՀԿ իմ քվոտան զիջել նրան»:
ՏԱԹԵՎ ՀԱՐՈՒԹՅՈՒՆՅԱՆ
«Առավոտ» օրաթերթ
18.06.2015
