Այսօր Վարչական դատարանում «Իրազեկ Քաղաքացիների Միավորում» ՀԿ-ն ընդդեմ ՀՀ Արտաքին գործերի նախարարության հայցով նախնական դատական նիստը կրկին հետաձգվեց:
Հիշեցնենք, որ «Իրազեկ Քաղաքացիների Միավորում» ՀԿ-ն հայցադիմումով նախարարությունից պահանջում է տրամադրել տարիներ շարունակ բանակցված և 2013 թվականին համաձայնեցնելուց հետո տապալած Հայաստան-ԵՄ Ասոցացման ու Խորը և համապարփակ առևտրի համաձայնագրի նախագիծը:
Հ/Կ համակարգող Դանիել Իոաննիսյանը պատմեց, որ նախարարության ներկայացուցիչը դատարանում պնդում է՝ համաձայնագրի նախագիծը ծառայողական գաղտնի է, այդ պատճառով չեն կարող ներկայացնել: Դատական նիստը հետաձգվեց, որ նախարարության ներկայացուցիչը ներկայացնի ապացույցներ, որ այդ նախագիծն իսկապես ծառայողական գաղտնիք է:
«Իրենք ասում են, որ փաստաթղթի հրապարակումը կարող է վնասել Հայաստանին: Երբ հարցնում եմ՝ ինչպես, պատասխանում են՝ այ օրինակ մեր հարեւան երկրներից մեկը, ենթադրաբար Ադրբեջանը, կարող է դա օգտագործել մեր դեմ ու այլ պետությունների վրա ճնշում գործադրի, որ այդ համաձայնագիրը տապալեն: Հարց է առաջանում՝ ինչու եք վախենում, որ Ադրբեջանը կարող է տապալել այդ համաձայնագրի ստորագրումը, եթե Սերժ Սարգսյանը 2013 թվականի սեպտեմբերի երեքի հայտարարությամբ արդեն տապալեց այդ համաձայնագրի ստորագրումը: Սա արդեն տապալված փաստաթուղթ է»,- ասաց Դանիել Իոաննիսյանը:
Կարդացեք նաև
Նրա խոսքով, իրենք այդ փաստաթուղթը պահանջում են, որ նախարարությանը ստիպեն ավելի բաց աշխատել, որ ՀՀ քաղաքացիներն էլ ներգրավված լինեն արտաքին քաղաքական գործընթացներում:
Արփինե ՍԻՄՈՆՅԱՆ
