«Ոչ թալանին» նախաձեռնության անդամներն այսօր Երեւանի մի շարք վարչական շրջաններում էլեկտրաէներգիայի սակագնի բարձրացման մասին իրազեկման ավտոերթ անցկացրին: Նրանք տեղեկացնում էին նաեւ վաղը Ազատության հրապարակում նախատեսված բողոքի երթի մասին, կոչ անում քաղաքացիներին միանալ ու պայքարել անհիմն, ապօրինի թանկացման դեմ:
Ավտոերթին միացել էին նաեւ «Ռեժիմն առանց 100 ամյակի» նախաձեռնության անդամները:
Նախաձեռնության անդամ Վարդան Հակոբյանը վստահեցնում է՝ լավ պայքարի դեպքում կարող են թանկացման դեմն առնել, նույնիսկ ստիպել գործող սակագինը էժանացնել. «Կարող ենք ստիպել նույնիսկ հրաժարական տան»:
Որպես օրինակ նա հիշեցրեց 100 դրամի պայքարը. «Եթե մեկ օր, որ ուշանար որոշման կասեցումը, արդեն իշխանափոխություն էր լինելու: Իրենք շատ լավ գիտեն այն գիծը, որտեղից արդեն հետդարձն է»:
Կարդացեք նաև
Դիտարկմանը այս պայքարը համեմատում եք 100 դրամի պայքարի հետ, բայց էլեկտրաէներգիայի սակագնի պայքարը թափթփված տպավորություն է թողնում, համաձա՞յն չեք, ասաց. «Ցանկացած պայքար ունի ծնվելու, ձեւավորվելու ու կարծրանալու ժամանակաշրջան: Չէի ասի՝ թափթփված պայքար է, որովհետեւ նոր է ծնվում, ձեւավորվում, ժամանակ տանք, որ կարծրանա… մինչեւ այս նախաձեռնությունը իր գործիքներով չդառնա պարտադրող, ոչ մի զիջում մի սպասեք կառավարությունից, որովհետեւ այս կառավարությունը կոչված է մարդկանց կեղեքել, թալանել, ստորացնել ու աղքատացնել մինչեւ այն սահմանը, որ մարդիկ թեւաթափ լինելով՝ լքեն Հայաստանը: Ինչքան շատ մարդ լքի, այնքան կհեշտանա իրենց գործը: Ու շատ արագ կարող են Հայաստանը վերածել դատարկ տարածության, որտեղ կերթեւեկեն ռուսական տանկերն ու այն բեռնատարները, որոնք կրում են մեր հանքարդյունաբերության հարստությունը, մեր ամբողջ ընդերքը»:
Արփինե ՍԻՄՈՆՅԱՆ
