Էդվարդ Նալբանդյանի կարծիքով՝ թուրքական կողմը հնարավորինս տարբեր հարցեր է փնտրում Հայաստանի դեմ հանդես գալու համար
Հայաստանի արտաքին գործերի նախարար Էդվարդ Նալբանդյանից 89-րդ «Ռոուզ-Ռոթ» սեմինարի ընթացքում իտալացի պատվիրակը հետաքրքրվեց, թե թուրքական կողմի տարածած հայտարարությունը, թե Հայաստանի ատոմակայանը խնդիրներ է առաջացնում հայ-թուրքական սահմանի բացման համար, արդյոք դա իրոք խնդի՞ր է, թե՞ ուղղակի պատրվակ է:
Էդվարդ Նալբանդյանը պատասխանեց, որ ինքը թուրքական կողմի հետ բանակցել է հայ-թուրքական արձանագրությունների շուրջ եւ 15 հանդիպում է ունեցել, երբեւէ ատոմակայանի հարցը չի բարձրացվել. «Դա պատրվակ է, գլխավոր իրենց նախապայմանները կապված էին ցեղասպանության հետ, մենք եկել ենք պայմանավորվածության, որ բանակցությունները վարվում էին առանց նախապայմանների, եւ որեւէ նախապայման չկա արձանագրությունների մեջ: Երբ որ մենք արձանագրությունները կնքեցինք, նրանք վերադարձան իրենց հին նախապայմանների լեզվին կապելով ԼՂՀ հիմնախնդրի կարգավորմանը եւ Հայոց ցեղասպանությանը»:
Նախարարն ասաց, որ թուրքական կողմը եւս պետք է նախապայմաններ չդնի. «Սա շինծու պատրվակ է, թուրքական կողմը հնարավորինս տարբեր հարցեր է փնտրում Հայաստանի դեմ հանդես գալու համար»:
Կարդացեք նաև
Ամի ՉԻՉԱԿՅԱՆ
