«Շանհայի համագործակցության կազմակերպությունը Եվրասիական տնտեսական միության ամենամոտ հարեւանն է: Ավելին՝ Ռուսաստանը, Ղազախստանը եւ Ղրղըզստանը երկու ինտեգրացիոն միավորումների անդամներ են, իսկ Բելառուսը եւ Հայաստանը ձգտում են ամրացնել իրենց կապերը ՇՀԿ-ի հետ»,- այս մասին այսօր Սանկտ Պետերբուրգում ՇՀԿ-ի եւ ԵՏՄ-ի համագործակցությանը նվիրված բիզնես ֆորումին ասել է Եվրասիական տնտեսական հանձնաժողովի անդամ (նախարար) Կարինե Մինասյանը:
Նախարարը նշել է, որ ԵՏՄ-ն եւ ՇՀԿ-ն ունեն համագործակցության լայն հեռանկարներ: «Մանավանդ որ, պետությունները, որոնք հանդիսանում են երկու կազմակերպությունների անդամները, կքննարկեն ինչպես ՇՀԿ գործընկերների հետ բիզնեսի վարման պայմանները, այնպես էլ ԵՏՄ շրջանակներում, հաշվի առնելով պայմանագրով ձեռքբերված պայմանավորվածությունները: Այդպիսով ավելի արդյունավետ կլինի ԵՏՄ անդամ երկրներին դարձնել ՇՀԿ-ի բանակցությունների ակտիվ մասնակիցներ: Միավորումների շատ նպատակներ համընկնում են»:
Կարինե Մինասյանն ընդգծել է, որ երկու կազմակերպությունների համագործակցության համար լիովին նոր ճանապարհ է բացում թվային տարածքի զարգացումը, այսպես կոչված թվային տնտեսությունը: Թվային տնտեսության բաժինը անդամ երկրների տնտեսությունների ՀՆԱ-ներում մեծ չէ, սակայն տարեցտարի այն մեծանում է մի քանի անգամ եւ տնտեսությունների արդիականացման եւ բարձր վարձատրվող աշխատանքների ստեղծման տեսանկյունից ամենակարեւոր սեգմենտներից մեկն է:
Պատրաստեց Աշոտ ԻՍՐԱԵԼՅԱՆԸ
