Խաղաղ պայմաներում զոհված զինծառայողների սեւազգեստ մայրերը կրկին հավաքվել են ՀՀ նախագահի նստավայրի առաջ: Ինչպես նախկինում, այնպես էլ այսօր, տասնյակ ոստիկաններ պատ կազմած խոչընդոտում են, որպեսզի կանայք մոտենան նախագահական նստավայրին, պատճառաբանելով, թե պահպանում են ողջամիտ հեռավորություն:
Մինչդեռ, Մարդու իրավունքների պաշտպանը մայրերին գրավոր պատասխանել է, որ նրանք իրավունք ունեն ազատ տեղաշարժվել, ինչպես նաեւ ակցիա իրականացնեն նախագահի նստավայրի դիմաց, եթե չեն խոչընդոտում նախագահականի բնականոն աշխատանքին:
Ի դեպ, ոստիկանները հրաժարվեցին անգամ վերցնել ու աչքի անցկացնել ՄԻՊ-ի պատասխանը, նշելով, որ այս դեպքում որոշողն իրենք են:
Կարդացեք նաև
Մինչ այսպիսի իրավիճակ է, նախագահականի կողքով ցանկանում էր Բաղրամյան փողոց դուրս գալ ՊՆ Ազգային ռազմավարական հետազոտությունների ինստիտուտի ղեկավար Հայկ Քոթանջյանը, սակայն քանի որ ոստիկանները մայրերին խոչընդոտում էին առաջ շարժվել, այդ հատվածում մարդկային կուտակում էր՝ ՊՆ մեքենան չէր կարողանում դուրս գալ: Մայրերը խնդրեցին Հ. Քոթանջյանին՝ ոստիկաններին հորդորել բացել ճանապարհը, սակայն նա անգամ մեքենայից դուրս չեկավ, պարզապես խոստացավ, որ նրանց որդիների հետ կապված խնդիրները կփոխանցի Սեյրան Օհանյանին:
Այստեղ են նաեւ մարդու իրավունքների պաշտպանությամբ զբաղվող փորձագետներ, ակտիվիստ Վարդգես Գասպարին, որն անընդհատ գոռում է՝ «մարդասպաններ, մարդասպաններ»:
Ոստիկանները համառորեն չեն բացում մայրերի ճանապարհը:
Տաթեւ ՀԱՐՈՒԹՅՈՒՆՅԱՆ
