Նախօրեին Արմավիրի բժշկական կենտրոնի ինֆեկցիոն բաժանմունք է տեղափոխվել Ջրաշեն գյուղի 4-ամյա մի աղջնակ, որը, սակայն, կարճ ժամանակ անց մահացել է։
ՀՀ առողջապահության նախարարության փոխանցմամբ, նա հոսպիտալացվել է ջերմություն, թուլություն, փսխում, լուծ ախտանշաններով, վիճակը գնահատվել է միջին ծանրության՝ սուր աղիքային ինֆեկցիա նախնական ախտորոշումով, ստացել է համապատասխան բուժում։ Երեկոյան կողմ երեխայի վիճակը կտրուկ վատացել է, նա տեղափոխվել է վերակենդանացման բաժանմունք, բայց բժիշկներին չի հաջողվել փրկել փոքրիկի կյանքը։
Ջրաշենի գյուղապետ Խաչատուր Դավթյանն ասաց, որ մահացած երեխայի ծնողները կատարվածի մեջ միանշանակ մեղադրում են բժիշկներին։ Գյուղապետի խոսքով, առավոտյան նրա մոտ թուլություն է նկատվել, ծնողները տարել են հիվանդանոց, երեխան ինքն իր ոտքով բարձրացել է բժշկի մոտ, բայց շուտով կաթիլային ներարկման ժամանակ մահացել է այն դեպքում, երբ մինչ այդ բժիշկը վստահեցրել էր, թե ոչ մի լուրջ բան չկա եւ մի քանի օրից դուրս կգրեն փոքրիկին։
Նա, ի դեպ, ծնողների միակ զավակն էր։ Մանկապարտեզ չէր գնում եւ այդ օրը, ըստ գյուղապետի, կերել էր հավի միս ու պաղպաղակ։
Ինչ վերաբերում է երեխայի՝ իր ոտքով բժշկի գնալու մասին գյուղապետի խոսքերին, ԱՆ-ի լրատվական ծառայությունից, ի պատասխան, նկատում են, որ գյուղապետը բժիշկ չէ եւ չի կարող գնահատել փոքրիկի առողջական վիճակը։ Ասացին, որ հոսպիտալացման պահին նրա վիճակը եղել է միջին ծանրության, բայց այդ դեպքում նույնպես հիվանդը կարող էր ոտքի վրա լինել։ Նաեւ փոխանցեցին, որ մինչեւ հիվանդանոց դիմելը երեխան 1 օր խնդիրեր է ունեցել, լուծել է, փսխել, ինչը ծնողները փորձել են բուժել պարացետամոլով։
Աննա ԶԱԽԱՐՅԱՆ
Հոդվածն ամբողջությամբ կարող եք կարդալ «Հայկական ժամանակ» թերթի այսօրվա համարում
