Հունիսի 12-ին Արցախի մայրաքաղաք Ստեփանակերտում կայացավ «Հորովել» երգի –պարի ու Գյումրու և Վանաձորի թատրոնների համատեղ համերգ ներկայացումը: Սա նախագծի երկրորդ բեմելն էր վանաձորյան պրեմիերայից հետ ու Գյումրիում՝ հունիսի 21-ին կայանալիք համերգից առաջ:
Թատրոնի ու պարի հանդիպումը՝ մեկ բեմում իր ձեւաչափով առաջինն էր արցախցի հանդիսատեսի համար: Հորովելյան գույներն ու ազգային գաղափարախոսության պահպանման հորովելյան մոտեցմանը Ստեփանակերտի մշակույթի եւ երիտասարդության պալատում ի թիվս հարյուրավոր արցախցիների ծանոթացավ նաեւ ԼՂՀ մշակույթի և երիտասարդության հարցերի նախարար Նարինե Աղաբալյանը: Համերգ-ներկայացման տպավորություններով նախարարը կիսվեց և հորովելցիներին շնորհակալություն հայտնեց արդեն Շուշիում կայացած հանդիպման ժամանակ՝ չմոռանալով պատվոգրեր հանձնել Վանաձորի քաղաքապետարանին ու «Հորովել»-ին՝ ազգասեր ու հայրենանվեր գործի համար:
«Շատ ուրախ եմ, որ ձեզ հյուրընկալել եմ Շուշիում՝ մեր նախարարությունում: Շատ հետաքրքիր համերգ-ներկայացում էր և հանդիսատեսի ոգևորությունն ու հիացմունքը դրա ապացույցն էր: Իսկապես մեր հայի տեսակով հպարտանալու, վատը խարազանելու, կարևորագույն ասելիքներ տեղ հասցնելու նպատակով համերգ-ներկայացումը ստացվեց: Պետք է շարունակենք քարոզել, պահպանել մեր մշակույթը» ,-ասաց նախարարը, հավելելով, որ Արցախի գյուղերում արդեն բացվում են մշակութային դպրոցներ, որը կնպաստի մշակույթի տարածմանն ու պահպանմանը:
Կարդացեք նաև
Համերգ-ներկայացման պրոդյուսեր Տիգրան Վիրաբյանն էլ համոզված է, որ Արցախում ամեն անգամ ներկայացում բեմադրելով մեկ աստիճանով բարձրացնում է տվյալ կոլեկտիվի մասնագիտական որակը:
«Արցախյան համերգը շատ կարեւոր էր նաեւ Գյումրու և Վանաձորի թատրոնների համար: Ամեն արվեստագետ գոնե մեկ անգամ պետք է ելույթ ունենա Արցախում: Ցավոք ինչպես Հայաստանում, այնպես էլ այստեղ ամեն ինչ կենտրոնացած է մայրաքաղաքում, մենք ցանկանում ենք, որ հաջորդ անգամ մեր ծրագրում ներառենք նաև Արցախի մյուս քաղաքները,-մեջբերեց պրոդյուսերը՝ չբացառելով, որ Գյումրիում կայանալիք համերգից հետո «Հորովել»-ը կհասնի նաեւ մայրաքաղաք ու կշրջի Հայաստանի ու Արցախի այլ քաղաքներով եւս:
Իսկ մինչ այդ հորովելցիները ազգային մշակույթի իրական հրավառություն՝ երգի, պարի ու թատրոնի համատեղմամբ խոստանում են գյումրեցի հանդիսատեսին՝ հունիսի 21-ին:
Նշենք նաեւ, որ համերգ-ներկայացման բեմադրիչներն են Գյումրու դրամատիկական թատրոնի գլխավոր ռեժիսոր Լյուդվիգ Հարությունյանն ու ՀՀ վաստակավոր արտիստ Հովհաննես Հովհաննիսյանը, նկարչական ձեւավորումը Լուսինե Խաչատրյանինն է: Նախագիծն իրականացվում է ՀՀ մշակույթի նախարարության և Վանաձորի քաղաքապետարանի աջակցությամբ:
Ստելլա ՀԱՐՈՒԹՅՈՒՆՅԱՆ
