Քիչ առաջ Հանրային ծառայությունները կարգավորող հանձնաժողովի աշխատակազմի քարտուղար Սողոմոնյանը հանդիպեց էլեկտրական էներգիայի սակագնի բարձրացման դեմ բողոքող երիտասարդների հետ, լսեց նրանց պահանջները: Երիտասարդները մասնավորապես պահանջում էին այսօր հետաձգել նիստը եւ հասկանալ, թե ինչպես են գոյացել պարտքերը, ինչպես են մնացել նախորդ տարիներից կուտակված ՀԷՑ-ի պարտքերը, որոնց համար քաղաքացիները նախորդ տարիներին վճարել են էլեկտրաէներգիայի սակագնի բարձրացման տեսքով:
Սողոմոնյանից ակտիվիստները նաեւ պահանջում էին թույլ տալ իրենցից 2-3 հոգու՝ մասնակցել հանձնաժողովի նիստին, բայց նա պատճառաբանեց, որ ներսում այնքան մարդ կա, որ տեղ չկա: Հանձնաժողովի աշխատակազմի քարտուղարը խոստացավ նրանց պահանջները կրկին զեկուցել հանձնաժողովի նախագահ Ռոբերտ Նազարյանին:
Կարդացեք նաև
Ակտիվիստներից մեկը դժգոհեց. «Ռոբերտ Նազարյանը հաշվի չի առնում ոչ մեկի առաջարկը»: Սրա հետ համաձայն չէր Սողոմոնյանը, նշելով, որ հաշվի են առել սակագնի վերաբերյալ բոլոր տարբերակները:
Ակտիվիստն էլ շարունակեց. «17 դրամը նորություն չէր, արդեն 2 ամիս է գիտենք՝ 17 դրամի մասին խոսում եք, որ 7 դրամով թանկացնեք»: Սողոմոնյանը ընդհանուր հայտարարի չգալով ակտիվիստների հետ՝ հեռացավ, իսկ ակտիվիստները նրա վրա նետեցին զուգարանի թղթեր, ասելով՝ «զուգարանի հոտ է գալիս վրայիցդ»:
Հանձնաժողովի շենքի դիմաց բերվել են ոստիկանական մեծ մեքենաներ, որոնք, ամենայն հավանականությամբ, ակտիվիստներին բերման ենթարկելու համար են:
Ակտիվիստներն արդեն տեղեկացել են հանձնաժողովի որոշման մասին՝ 6,93 դրամով էլեկտրաէներգիայի սակագինը բարձրացնելու մասին եւ կրկին սկսել են ձվեր նետել հանձնաժողովի շենքի վրա՝ ամոթանք տալով թե հանձնաժողովին, թե իշխանություններին: Նրանք վրդովված են, որ հանձնաժողովի նախագահը չբարեհաճեց իրենց լսել: Այս պահին ակտիվիստները ծրագրում են իրենց հետագա քայլերը:
Քիչ առաջ ակտիվիստներին միացավ նաեւ Արմեն Ռուստամյանը: Հարցին, թե Բիբինը արհամարհե՞ց խորհրդարան չգալով եւ ինչո՞ւ պատգամավորները քայլեր չձեռնարկեցին թեկուզ ստիպելով նրան խորհրդարան բերել, պատգամավորն ասաց, որ Բիբինը ինչ-որ տեղ նաեւ իրավունք ուներ չգալու՝ որպես մենաշնորհ ունեցող ընկերության ղեկավար, չնայած գոնե սպառողներին հարգելով պետք է գար: Ըստ նրա, որեւէ սպառող մեղավոր չէ էլեկտրաէներգիայի սակագնի բարձրացման համար, բոլորս էլ գիտենք, թե ինչ կարող են անել «լույսի մարդիկ»:
Արփինե ՍԻՄՈՆՅԱՆ
