ՀՀ ԱԺ-ում արտահերթ նիստի ընթացքում բուռն քննարկումների տեղիք տվեց «Զինծառայողների եւ նրանց ընտանիքների անդամների սոցիալական ապահովության մասին» ՀՀ օրենքում լրացում կատարելու մասին հարցը: Հիմնական հակասությունները վերաբերում էին նրան՝ արդյոք օրենքում կարո՞ղ ենք ամրագրել, որ արտոնությունները վերաբերվեն բոլոր զինծառայողներին:
Կորյուն Նահապետյանին այս հարցով քննարկումների ժամանակ չի բավարարել կառավարության դիրքորոշումը. «Անհասկանալի է կառավարության դիրքորոշումն այս մասին: Ցավում եմ, որ կառավարության ներկայացուցիչներն, ըստ էության, չմասնակցեցին այս օրենքի հրապարակային քննարկմանը»:
Այնուհետև պնդեց. «Անհրաժեշտ է այս օրենքի շրջանակներում բոլոր զինծառայողների համար նախատեսել նման հնարավորություն, քանի որ ոչ պաշտոնական հաշվարկներով՝ դրանք մեծ գումար չեն կազմելու»:
Օրենքի նախագծի համահեղինակ ՀՀԿ խմբակցության պատգամավոր Արփինե Հովհաննիսյանը հայտարարեց, թե ելույթներից այնպիսի տպավորություն է ստանում, որ իրենք պայքարում են իրենց գործընկերների դեմ, որոնք ուզում են, որ բոլոր զինծառայողները բուժում ստանան արտերկրում:
Կարդացեք նաև
Գնահատելով շատ պատգամավորների փորձառությունը` ՀՀԿ-ական պատգամավորը նշեց, որ փորձառությանը սրբազան սարսուռով չի վերաբերվում. «Մենք ընդամենը ռեալիզմը գերադասել ենք հնարավորությունների և կարողությունների համադրմամբ բացասական սալդոյին»:
ՀՀ ԱԺ ՀԱԿ խմբակցության պատգամավոր Գագիկ Ջհանգիրյանն ի պատասխան այն դիտարկումների, որ պետք է արտոնություններ սահմանվեն մարտական հերթապահություն սահմանող զինծառայողների նկատմամբ ու ընդդիմացողներին, ասաց. «Եթե ձեզ թվում է, որ այս մարտական հերթապահությունը հաճելի բան է, սխալվում եք, քանի որ մեր բոլոր զինծառայողները և նրանց հարազատներն առավոտից իրիկուն հնարավոր բոլոր միջոցները, նաև ապօրինի՝ գործադրում են, որ կարողանան խուսափել առաջին գծում ծառայելուց և մարտական հերթապահություն կրելուց»:
ՀՀ ԱԺ «Ժառանգություն» խմբակցության պատգամավոր Թևան Պողոսյանը մտահոգություն հայտնեց, թե մինչև չորոշվի հիվանդությունների հստակ ցանկը, օրենքը կարող է կոռուպցիոն լուրջ ռիսկեր ունենալ: Այնուհետև նկատեց. «Գուցե բոլոր բառը օրենքում գրելուց հետո մարդիկ չե՞ն մտածի, թե տղաներին ոնց փախցնեն ծառայությունից, քանի որ իսկապես պետությունը տեր է կանգնելու զինվորին»:
Տաթև ՀԱՐՈՒԹՅՈՒՆՅԱՆ
