ՀՀ ԱԺ-ն արտահերթ նստաշրջանի սկզբին ընդունեց կառավարության ներկայացրած մի շարք նախագծեր: Օրինակ` ընդունվեցին «ՀՀ քաղաքացիական օրենսգրքում փոփոխություններ եւ լրացումներ կատարելու մասին», «Ավիացիայի մասին» ՀՀ օրենքում փոփոխություն կատարելու մասին նախաձեռնությունները: Մինչ այս քվեարկությունը ՀՀ ԱԺ ԲՀԿ խմբակցության ղեկավար Նաիրա Զոհրաբյանը հայտարարեց, թե «ձեռնպահ են» քվեարկելու ու մանրամասնեց. «Կա մի ընկերություն, որն ազգային փոխադրողի համար է դիմել, բայց նախարարն այլ բան է ասում: Սա ճիշտ մոտեցում չէ, մեղմ ասած կառավարության ներկայացուցիչները քանի տարի այդ մարդուն այստեղից այնտեղ են ուղարկում: Ուստի չենք կարող կողմ քվեարկել այս օրենքին միայն կոսմետիկ փոփոխությունների արդյունքում»:
ԱԺ տնտեսական հարցերի մշտական հանձնաժողովի նախագահ Վարդան Այվազյանը տիկին Զոհրաբյանին հակադարձեց, թե «բարի եղեք, հարցին լավ տիրապետեք» ու հայտարարեց, թե նախարարը նման բան ասած չէր կարող լինել ու մանրամասնեց. «Ազգային փոխադրողը ցանկանում է նույն կերպ առանձնահատուկ վերաբերմունք ազգային փոխադրողի նկատմամբ, իսկ այս օրենքով ազատ երկնքի քաղաքականությունը հավասար պայմաններ է ստեղծում»:
Տաթև ՀԱՐՈՒԹՅՈՒՆՅԱՆ
