Իսկ աշնանը հնարավոր է՝ այն շրջագայի արտասահմանում
Հունիսի 19-ին Էջմիածնի Մաչանենց պատկերասրահում կկայանա «Շուշիից Շուշի» լուսանկարչական ցուցահանդեսի բացումը, որը նախաձեռնել է ART PR ընկերությունը: Ինչպես «Առավոտի» հետ զրույցում նշեց ART PR ընկերության տնօրեն, ցուցահանդեսի համադրող Գայանե Դավթյանը, «Շուշիից Շուշին» մեծ արձագանք է գտել եւ Շուշի քաղաքում, որտեղ ցուցադրվել է մայիսի 8-ին, եւ Գյումրիում: Ինչ վերաբերում է Էջմիածնում կայանալիք 3-րդ ցուցադրությանը, որ կուղեկցվի երաժշտությամբ եւ գինու համտեսով, նրանից եւս մեծ ակնկալիքներ ունեն:
Ցուցահանդեսին ներկայացված են հայտնի լուսանկարիչներ Հակոբ Բերբերյանի, Զավեն Խաչիկյանի, Ռուբեն Մանգասարյանի (հետահայաց), Տիգրան Մանգասարյանի, Աշոտ Մուրադյանի եւ Մաքս Սիվասլյանի բացառիկ ֆոտոշարքերը, որոնք թվագրված են 1992թ.-ից մինչեւ մեր օրերը:
Կարդացեք նաև
«Մենք ուզում էինք, որ «Շուշիից Շուշին» պտտվի, եւ որպես շրջիկ ցուցահանդես՝ շատ վայրերում լինի: Մենք նույնիսկ արտասահմանից ենք հրավերներ ստացել եւ շատ հնարավոր է, որ ցուցահանդեսն աշնանը պտտվի արտասահմանում եւս: Բոլոր միջոցառումները կենտրոնացած են Երեւանում, ու մեր նպատակը ցուցահանդեսը Երեւանից դուրս բերելն էր: Ուրախ ենք, որ «Շուշիից Շուշի» ցուցահանդեսը ջերմ ընդունվեց: Հույս ունենք, որ նույնը Էջմիածնում կլինի, այնտեղ էլ կլինեն քաղաքային իշխանությունները, արվեստագետներ, մանկավարժներ: Հավելեմ, որ «Շուշիից Շուշին» իրականացվեց առաջին տիկին Ռիտա Սարգսյանի հովանու ներքո եւ ՀՀ մշակույթի նախարարության ջանքերով: Նախագիծն իր բացառիկությամբ գրավեց հանրությանը, որովհետեւ այստեղ բացառիկ լուսանկարներ կային, եւ 6 լուսանկարիչները, որոնք մասնակցեցին ցուցահանդեսին, իրենց անձնական արխիվից սիրով տրամադրեցին այդ լուսանկարները»,- հայտնեց տիկին Դավթյանը:
ART PR ընկերության տնօրենը նշեց, որ Շուշիում եւ Գյումրիում ցուցահանդեսի բացմանը ներկա են եղել Շուշիի ազատագրմանը մասնակցած ազատամարտիկներ, նրանք հրավիրված են նաեւ Էջմիածնի ցուցադրությանը:
«Շուշիից Շուշի» նախագիծը նպատակ ուներ՝ օգնել Շուշիին, ավելի լայն հասարակությանը ներկայացնել Շուշին՝ որպես մշակութային քաղաք, արվեստի կենտրոն եւ չնաշխարհիկ բնակավայր: Ցավոք, Շուշին այսօր բնակեցված չէ, եւ մեր խնդիրներից մեկն է կոչ անել «դրսում» ապրող շուշեցիներին, որ վերադառնան իրենց ծննդավայր եւ ծաղկեցնեն այն: Անձամբ ինձ համար էլ Շուշին բացառիկ ձգողականություն ունի ու ամենաչքնաղ վայրերից մեկն է Արցախում եւ Հայաստանում»,- հավելեց մեր զրուցակիցը: Նրա խոսքով, լուսանկարների միջոցով ցանկացել են եւս մեկ անգամ վերհիշել ու հատկապես նոր սերնդին ներկայացնել այն փառահեղ ճանապարհը, որն անցել են մեր հերոսները՝ ազատագրելով Շուշին. «Սա նախեւառաջ հարգանքի տուրք եւ խոնարհում է՝ Արցախյան պատերազմով անցած յուրաքանչյուր զինվորի առաջ։ Լուսանկարչական վավերագրության միջոցով փորձում ենք անցնել հաղթանակած տարիների միջով. ինչպիսին էր 92թ.-ի Շուշին, ինչպիսին՝ այսօրվա Շուշին։ Ներկայացված ֆոտոշարքերը մինչ այսօր դեռ որեւէ տեղ ցուցադրված կամ հրապարակված չեն եղել»,- ասաց Գայանե Դավթյանը:
ԳՈՀԱՐ ՀԱԿՈԲՅԱՆ
Լուսանկարները տրամադրել է
ԳԱՅԱՆԵ ԴԱՎԹՅԱՆԸ
«Առավոտ» օրաթերթ
16.06.2015
