Այսօր Գյումրիի, Եղվարդի, Աբովյանի, Արտաշատի եւ Արարատի քաղաքացիների ներկայացուցիչները բաց նամակ հանձնեցին Հանրային ծառայությունները կարգավորող հանձնաժողովին՝ պահանջելով դադարեցնել էլեկտրաէներգիայի սակագնի թանկացմանն ուղղված բոլոր միջոցառումները, ինչպես նաեւ հետաքննություն սկսել ՀԷՑ-ում տիրող ֆինանսական վիճակի, հնարավոր կոռուպցիոն գործարքների և ֆինանսական մեքենայությունների վերաբերյալ: Նամակում, մասնավորապես, ասվում է.
«2014 թվականին Հանրային ծառայությունները կարգավորող հանձնաժողովը չհիմնավորված փաստարկներով թանկացրեց էլեկտրաէներգիայի սակագինը՝ հայտարարելով, որ այն առաջիկա մի քանի տարիներին չի փոխվի: Այսօր արդեն ժողովրդին փորձ է արվում պարտադրել նոր սակագին, 40%-ով ավելին, քան ներկա գործող արդեն իսկ չհիմնավորված թանկ սակագինն է: Այն չունի տնտեսական հիմնավորում և պայմանավորված է բացառապես ՀԷՑ-ում տիրող ամենաթողությամբ, լայնածավալ կոռուպցիայով, որը տեղի է ունենում ՀՀ Կառավարության գիտությամբ»:
iLur.am-ի հետ զրույցում Գյումրիից «Ո՛չ՝ թալանին» նախաձեռնության անդամ Վահագն Խաչատրյանը նշեց, որ իրենք չեն պատրաստվում ոչ մի լումա ավել վճարել: «Մենք տեղյակ ենք, որ այս ամենը ոչ մի տնտեսական հիմնավորում չունի, տեղի է ունեցել թալանի միջոցով՝ Սերժ Սարգսյանի եւ այս իշխանությունների աչքաթողության պատճառով: Նրանք ասում էին, որ այդ թալանի միջոցով կուտակված գումարը պետք է քաղաքացին վճարի, սակայն մենք ի վիճակի չենք վճարել եւ չենք էլ պատրաստվում: Մենք մինչեւ վերջ գնալու ենք եւ չենք նահանջելու»,- հայտարարեց Վահագն Խաչատրյանը: Վերջինս հայտնեց նաեւ, որ մայիսի 27-ին երթով Գյումրիի ակտիվ քաղաքացիները բաց նամակ են հանձնել նաեւ Շիրակի մարզպետին եւ Գյումրիի քաղաքապետին: Նրա խոսքով՝ երկու օրվա ընթացքում Գյումրիում հավաքվել է ավելի քան 1500 ստորագրություն:
Մանրամասներին կարող եք ծանոթանալ iLur.am-ի կայքում
