Այսօր ԱԺ նիստում քվեարկության դրվեց Ղրղզստանի՝ ԵՏՄ-ին միանալու պայմանագիրը, որը երեկ բուռն քննարկվել էր ԱԺ-ում:
91 կողմ, 4 դեմ քվեարկության արդյունքներով խորհրդարանը հավանություն տվեց պայմանագրին:
Արդարադատության փոխնախարար Արսեն Մկրտչյանը ներկայացրեց «Քաղաքացիական օրենսգրքում», «Քաղաքացիական դատավարության օրենսգրքում» փոփոխություններ կատարելու մասին նախագծերը: Նախագծով առաջարկվում է խթանել արբիտրաժային ինստիտուտի կայացմանը, որը կթեթեւացնի դատարանների աշխատանքը: Քաղաքացիական վեճերն արդեն կարող են լուծվել նաեւ արբիտրաժում:
ԲՀԿ պատգամավոր Միքայել Մելքումյանը հարցրեց՝ «Սա ավելի մատչելի՞ է լինելու քաղաքացիների համար, թե՞ ավելի են ընկնելու քաշքշուկների մեջ, ասելու են՝ էս արբիտրաժից էլ հեռու մնանք»:
Կարդացեք նաև
Արսեն Մկրտչյանը պատասխանեց. «Իհարկե, սա ավելի ճկուն համակարգ է եւ ավելի արդարացված է: Միջազգային փորձը ցույց է տալիս, որ բիզնես գործընթացում վեճերը միանգամից արբիտրաժին են ուղղում: Անկախ ամեն ինչից, սպառողը միշտ իրավունք ունի գնալ դատարան»:
Միքայել Մելքումյանը նաեւ հետաքրքրվեց՝ էլեկտրաէներգիայի սակագնի հետ կապված սպառողները կարո՞ղ են արբիտրաժում վիճարկել եւ պաշտպանել իրենց իրավունքները»:
Փոխնախարարը պատասխանեց, որ արբիտրաժի դեպքում պետք է լինի համաձայնություն կողմերի միջեւ՝ վեճը արբիտրաժին հանձնելու. «Եթե երկու կողմից չկա ստորագրություն եւ համաձայնություն, չկա արբիտրաժ»:
Հռիփսիմե ՋԵԲԵՋՅԱՆ
