Ինչպես արդեն տեղեկացրել ենք՝ ՀՀ ԱԺ-ն արտահերթ նստաշրջանում քննարկում է 2015 թվականի մայիսի 8-ին Մոսկվայում ստորագրված «Ղրղըզստանի Հանրապետության` «Եվրասիական տնտեսական միության մասին» 2014 թվականի մայիսի 29-ի պայմանագրին միանալու մասին» 2014 թվականի դեկտեմբերի 23-ին ստորագրված պայմանագրին Հայաստանի Հանրապետության միանալու մասին»արձանագրությունը:
«Ժառանգություն» խմբակցության պատգամավոր Թևան Պողոսյանը քննադատեց, թե արդյոք քանի՞ խումբ ենք ուղարկել Ղրղըզստան, որ ուսումնասիրի այնտեղ տնտեսական իրավիճակը և այլ հարցեր, կամ Ղրղըզստանի խորհրդարանից գային, ներկայացնեին իրավիճակը, մեզ հարգեին, «բայց չեն անում, քանի որ գիտեն, որ խելոքի պես քվեարկելու ենք»:
Քննադատություններին ի պատասխան արտահերթ ելույթ ունեցավ ՀՀ ԱԺ փոխնախագահ Էդուարդ Շարմազանովը: Նա պնդեց, թե ՀՀ-ի՝ ԵՏՄ անդամակցության դրական արդյունքներն արդեն տեսանելի են և ինչո՞ւ պետք է այժմ մենք հրաժարվենք Ղրղըզստանի՝ 6 միլիոնանոց շուկայից: Նա ասաց. «Ինձ մոտ տպավորություն է ստեղծվում, որ 2013-ին քնել ենք, 2015-ին արթնացել, ու տեղյակ չենք, թե ինչ է տեղի ունեցել մեր տարածաշրջանում: Եթե ձեզ թվում է, որ պետք է նստենք թախտին, սպասենք բախտին, այդպես չէ, որևէ մեկը մեր տեղը չի աշխատելու: Պիտի քրտնենք ու նվաճենք այդ շուկաները»:
Ամփոփելով ելույթը՝ Էդուարդ Շարմազանովը հայտարարեց. «Այս հեքիաթները խնդրում եմ ժամը 10-ից հետո պատմեք ձեր երեխաներին, ոչ թե այս դահլիճում»:
Կարդացեք նաև
Ի պատասխան Թևան Պողոսյանը հայտարարեց, թե երկու «հեքիաթ» է պատմելու ու հիշեցրեց, որ ցանկացած ծնող, եթե իր երեխայի համար երեկոները հետաքրքիր անցկացնի ու հեքիաթ պատմի, երեխան ավելի բարի ու հանդուրժող կլինի: Նաև հիշեցրեց, որ ծնողը երեխային ասում է, որ երբ մարդիկ խոսում են, լսիր, վերլուծիր, հետո որոշում կայացրու: Մյուս «հեքիաթը» ազնվության մասին էր, որ եթե մի բան չի ստացվում, ապա մարդ պետք է ազնվություն ունենա դա ընդունի: Իսկ մյուս հեքիաթն այն է, որ ծնողը երեխային ասում է, որ պետք է անես այնպես, որ քեզ հետ հարգալից վարվեն:
Էդուարդ Շարմազանովը հայտարարեց, թե պետք չէ դատավորի կեցվածք ընդունել: Այնուհետև հեգնեց, թե ժամը վեցից հետո էլ պոեզիայի ժամն է գալիս:
Տաթև ՀԱՐՈՒԹՅՈՒՆՅԱՆ
