Այսօր ԱԺ-ում լրագրողները խորհրդարանի նախագահ Գալուստ Սահակյանից հետաքրքրվեցին, թե ի՞նչն է պատճառը, որ ԼՂՀ պաշտպանության բանակի հրամանատար Մովսես Հակոբյանին տեղափոխում են այստեղ:
Գալուստ Սահակյանը պատասխանեց. «Դա բանակ է, հայկական բանակ է: Նրանք ոչ թե խորհրդարանում քննարկում են կամ չգիտեմ ինչ են անում, նրանք ունեն իրենց կանոնակարգը, կարող են տեղափոխել, նշանակել: Կոնկրետ այդ դեպքում դա հնարովի ինչ-որ մոտեցում է»:
Լրագրողները ճշտեցին՝ այսինքն, դա հնարովի մոտեցո՞ւմ է, որ նրան տեղափոխելու են Երեւան եւ զբաղեցնելու է ՀՀ գլխավոր շտաբի պետի տեղակալի պաշտոնը՝ Գալուստ Սահակյանը պատասխանեց. «Գիտեք, հիմա եթե ես դուրս գամ, մի ուրիշ լրագրողի հանդիպեմ, ասեմ՝ դուք ուկրաինուհի եք, վաղը կսկսեն ձեզ հարցնել՝ դուք ուկրաինուհի՞ եք, թե՞ չէ, դուք ի՞նչ եք ազգությամբ»:
Ինչ վերաբերում է ընտրություններից առաջ Ղարաբաղից պաշտոնյա բերելուն՝ Գալուստ Սահակյանն արձագանքեց. «Ղարաբաղը Հայաստանն է: Գյումրիից բերեինք, պիտի ասեիք՝ ինչո՞ւ Գյումրիից բերեցիք, Երեւանից բերեինք՝ պիտի ասեիք՝ ինչո՞ւ Երեւանից»:
Կարդացեք նաև
Հարցին՝ արդյոք դրանով պատրաստվում եք Սեյրան Օհանյանի՝ նախագահ լինելու գործընթացին՝ Գալուստ Սահակյանը հերքեց. «Մենք ոչնչի չենք պատրաստվում: Մենք գնում ենք սահմանադրական բարեփոխումների: Այդ շրջանակներում, երբ կադրերի հարց լինի՝ դուք կիմանաք: Կադրերի հարց այս պահին չի քննարկվում»:
Լրագրողները նաեւ հետաքրքրվեցին՝ ֆուտբոլ նայե՞լ եք, ինչպե՞ս կմեկնաբանեք Շանթ Հարությունյանի որդու՝ Շահեն Հարությունյանի բողոքի ակցիան, նա բողոքի ձայն էր բարձրացրել՝ քաղբանտարկյալների համար: Նա պատասխանեց. «Այնքա՜ն են բողոքում, էդ ձայները ես ո՞նց հավաքեմ: Դուք պիտի նկարահանեք, ցույց տաք, որ ես տեսնեմ: Չեմ տեսել»:
Այնուամենայնիվ, նա վստահեցրեց, որ Հայաստան-Պորտուգալիա խաղը նայել է եւ շատ հպարտացել է մեր թիմով: Իսկ քաղբանտարկյալ հասկացությունը նա չընդունեց:
Հարցին՝ ինչպե՞ս կմեկնաբանեք, որ Շանթ Հարությունյանի որդին իր հոր համար նման ակցիա արեց՝ Գալուստ Սահակյանն արձագանքեց. «Դու էլ քո հոր համար արա»:
Հռիփսիմե ՋԵԲԵՋՅԱՆ
