Այն, որ այլընտրանքային էներգետիկան Հայաստանում չի զարգանում կամ շատ դանդաղ տեմպերով է առաջ գնում, փաստում են մասնագետները՝ վկայակոչելով մի շարք ծրագրեր, որոնք կառավարության կողմից այդպես էլ չեն խրախուսվում եւ կես ճանապարհին տապալվում են: Այլընտրանքային էներգետիկայի զարգացմանը վերաբերող գործարարների ներկայացրած բիզնես-ծրագրերն էլ, որպես կանոն, պետության սուբսիդավորմամբ վարկային կազմակերպությունների կողմից հազվադեպ են հավանության արժանանում. պատճառաբանվում է, թե արժանահավատ չեն:
Մասնագետները վստահ են, որ այլընտրանքային էներգետիկայի զարգացմանը խոչընդոտելը մեր երկրում պետական մակարդակով է տեղի ունենում, որպեսզի գազամատակարար կամ էլեկտրամատակարար ընկերությունների բիզնեսը ոչ մի դեպքում չտուժի:
Դրա վառ ապացույցներից մեկը ժամային գոտիների անփոփոխ թողնելն է, ինչը ամրագրվել է օրենքով: Տնտեսագետ Վիլեն Խաչատրյանի համոզմամբ՝ ժամային գոտին չենք փոխում ոչ այն պատճառով, որ մարդիկ սթրեսի չենթարկվեն, ինչպես որ պատճառաբանում են նման օրենքի հեղինակները, այլ՝ որ բնակչությունն էլեկտրաէներգիա շատ սպառի:
«Ոչ թե փորձում են այնպես անել, որ մեր ազգը էլեկտրաէներգիա քիչ սպառի, ինչպես ամբողջ զարգացած երկրներում է տեղի ունենում, այլ միտումնավոր, օրենսդրական մակարդակով այնպես են անում, որ շատ սպառի, ինչը բացասական է, եւ նման ձեւով չի կարելի տնտեսությունը զարգացնել: Նման մոտեցումների հիման վրա չի կարելի երկիր պահել եւ իր քաղաքացիներին այդպիսի վնասներ հասցնել»,- նկատում է պարոն Խաչատրյանը: Ըստ նրա. «Այդ ժամային գոտիների անցումը հենց նրա համար է, որ էլեկտրաէներգիան խնայեն, երբ արեւ է՝ մարդիկ նախընտրում են ավելի շուտ արթնանալ, որ ավելի քիչ էլեկտրաէներգիա օգտագործեն: Մեզ մոտ դիտավորյալ հակառակն են արել, քանի որ նման պարագայում էլեկտրաէներգիայի սպառման ծավալները կկրճատվեն: Հիմա միտումնավոր թողնում են՝ մարդը մութ ժամանակահատվածում արթուն մնա, որ էլեկտրաէներգիայի սպառման ծավալն ավելանա»:
ԼՈՒՍԻՆԵ ԲՈՒԴԱՂՅԱՆ
«Առավոտ» օրաթերթ
13.06.2015
Ես պատկանում եմ այն սերնդին, որն իր դպրոցական և ուսանողական տարիներին չէր “ենթարկվում” ժամային գոտու փոփոխությունների ոչ` ամռանը, ոչ էլ` ձմռանը: Վստահաբար կարող եմ ասել, որ մեզ համար, իսկապես սթրես է և դա պատճառաբանություն չէ: Մենք ենթարկվում ենք կենսաբանական փոփոխության, որն իսկապես` սթրես է…