Մեկ-երկու տարուց արյունաբանական կենտրոնում կստեղծվի ոսկրածուծի փոխպատվաստման բաժանմունք, ինչը հնարավորություն կտա ոսկրածուծի փոխպատվաստման կարիք ունեցող հիվանդներին մեր երկրում բուժվել եւ հազարավոր դոլարներ չծախսել արտերկրում բուժումը կազմակերպելու համար: Այսօր առողջապահության նախարարությունում կազմակերպված ասուլիսում նախարարության գլխավոր արյունաբան Սմբատ Դաղբաշյանն ասաց, որ մեր երկրում տարեկան 60 մարդու մոտ ոսկրածուծի փոխպատվաստման անհրաժեշտություն կա, 70 մարդ էլ` քիմիաթերապիայի կարիք ունի: Տարածաշրջանի երկրների համեմատությամբ այս թիվը ոչ ավել է, ոչ պակաս:
Սակայն բաժանմունք ունենալով դեռ այս ոլորտի խնդիրները չեն լուծվում, քանի որ փոխպատվաստման հարցում մեր երկրում մասնագետների կարիք կա: Այս պահին մի քանի մասնագետ արտերկրում` Պրահայում, Սանկտ Պետերբուրգում, ԱՄՆ-ում վերապատրաստում են անցնում. «Եթե մասնագետներ չլինեն, չենք կարող այդ բաժանմունքն աշխատեցնել»,-ասաց պարոն Դաղբաշյանը:
Արյան դոնորի միջազգային օրվա առիթով, որն աշխարհը նշում է հունիսի 14-ին, պարոն Դաղբաշյանը կոչ արեց դոնորության գաղափարը, մշակույթը զարգացնել, քանի որ դոնորների արյան միջոցով մարդկային կյանքեր են փրկվում:
Հայաստանում դոնորների ցուցանիշը շատ ցածր է. դոնորների 45 %-ը վճարվող դոնորներն են եւ միայն 8 տոկոսն են, որ կամավոր են արյուն հանձնում: Ըստ գլխավոր արյունաբանի, զարգացած երկրներում բնակչության 50-60 հազար մարդ դոնոր են լինում, մեր երկրում` 15 հազար մարդ է, ինչը 3-4 անգամ պակաս ցուցանիշ է: Նման ցածր ցուցանիշի պատճառն, ըստ մասնագետի, հասարակության շրջանում դոնորության վերաբերյալ տեղեկացվածության անբավարար մակարդակն է, սխալ պատկերացումները, վախերն ու անվստահությունը: Չնայած Սմբատ Դաղբաշյանը նշեց, որ մեր երկրում էլ, տարեցտարի, դոնորների քանակի որոշակի աճ է դիտվում:
Դոնոր կարող են դառնալ 18 տարին լրացած անձինք: Դոնորի արյունը ստուգվում է ինֆեկցիաների, հեպատիտների, սիֆիլիս հիվանդության, բրուցելյոզի, ՄԻԱՎ/ՁԻԱՀ-ի նկատմամբ: Արյունաբանական կենտրոնից արյուն վերցնելիս քաղաքացիները վճարում են, եթե այդ արյունը հիվանդի հարազատներից չեն տվել, 1 տուփ արյունն արժե 10 հազար դրամ, այս գումարը նրա համար է, որպեսզի վճարեն դոնորին: Իսկ երբ հիվանդի հարազատներն են արյուն տալիս, ապա այդ դեպքում արյունը վերցնելն անվճար է:
Կարդացեք նաև
Լուսինե ԲՈՒԴԱՂՅԱՆ
